|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 375 Hüküm no: 534 Orijinal metin no: [288-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Beytülmâl emîninin vâris bırakmadan ölen Hasan Bey’in evinin vakfedildiğinin anlaşıldığı
Havâss-ı aliyye tevâbi‘inden Hasköy nâm kasabada bi’l-fi‘il beytülmâl emîni olan Mustafa Bey b. Mehmed mahfil-i kazâda yine kasaba-i mezbûrede el-Hâc Mehmed mahallesinde vâki‘ mezbûr el-Hâc Mehmed binâ eylediği mescidde imâm olan Mustafa Efendi b. Surûrî mahzarında üzerine da‘vâ ve takrîr-i kelâm edip mahalle-i mezbûrede vâki‘ bir tarafı Kazzâz Ömer Çelebi mülküne ve bir tarafı Mehmed Bey mülküne ve bir tarafı yine mezbûr Mehmed Bey tarlasına ve taraf-ı âharı tarîk-i âmma müntehî olup iki bâb tahtânî odaları ve muhavvatayı muhtevî olan menzil Koca Hasan Bey nâm kimesnenin mülkü olup mezbûr Hasan Bey vefât ettikde vâris-i ma‘rûfu olmayıp muhallefâtı cânib-i beytülmâle âid olmuşken mezbûr Mustafa Efendi zabt ve tasarruf eder, emânetim hasebiyle taleb ederim suâl olunsun dedikde gıbbe’s-suâl merkūm Mustafa Efendi cevâbında fi’l-vâki‘ zikr olunan menzil mezbûr Koca Hasan Bey’in mülkü olup lâkin hâl-i hayâtında ve kemâl-i sıhhatinde vakf-ı sahîh-i şer‘î ile vakf ve habs edip tevliyet ve süknâsını evvelâ kendi nefsine, ba‘de vefâtihî mahalle-i mezbûre sâkinlerinden Kara Hasan nâm kimesneye ba‘dehû mezbûr Kara Hasan’ın evlâdına ve evlâd-ı evlâdına ba‘de’l-inkırâz ecr-i misli ile âhara îcâr olunup icâresinden hâsıl olan meblağ mescid-i mezbûrda her kim imâm olursa ana verilip ol dahi her gün ba‘de salâti’z-zuhr bir Sûre-i Mülk-i şerîf tilâvet edip sevâbını rûhuma ihdâ eyleye deyû şart ve ta‘yîn eylediğinden sonra mezbûr Koca Hasan Bey vefât edip ba‘dehû merkūm Kara Hasan dahi vefât edip evlâdı munkarız oldukdan sonra nevbet-i tasarruf bana intikāl eyledi dedikde, gıbbe’l-istintâk ve’l-inkâr merkūm Mustafa Efendi’den sıdk-ı makālini mübeyyine beyyine taleb olundukda udûl-i ricâlden Mahmud Çelebi b. Mehmed ve Osman Bey b. Mustafa nâm kimesneler li ecli’ş-şehâde meclis-i şer‘-i şerîfe hâzırân olup gıbbe’l-istişhâd fi’l-hakīka müteveffâ mezbûr Koca Hasan Bey hâl-i hayâtında ve kemâl-i sıhhatinde menzil-i merkūmu bizim huzûrumuzda minvâl-i muharrer üzre vakf ve habs edip tevliyet [ve] süknâsını evvelâ kendi nefsine ba‘dehû Kara Hasan’a ba‘dehû evlâd-ı [289] evlâdına ba‘de’l-inkırâz gallesine mescid-i mezbûrda her kim imâm olursa ol mutasarrıf olup rûhu için ba‘de salâti’z-zuhr bir Sûre-i Mülk-i şerîf tilâvet eyleye deyû şart ve ta‘yîn eyledi, biz bu husûsa bu minvâl üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de ri‘âyet-i şerâ’iti’l-kabûl şehâdetleri hayyiz-i kabûlde vâkı‘a oldukdan sonra emîn-i merkūm Mustafa Bey mütâlebeden men‘ olunup mâ vaka‘a bi’t-taleb ketb olundu. Hurrire fi’l-yevmi’s-sâbi‘ aşer min şehri Rebî‘ılâhir li sene isneteyn ve hamsîn ve elf.
Şuhûdü’l-hâl: Mehmed Çelebi b. Mustafa, Şaban b. Mustafa, Ahmed b. Abdullah, Mahmud b. Hasan, Ömer Beşe b. ( )
|