|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 376 Hüküm no: 535 Orijinal metin no: [289-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Masko v. İsrâyil’in iki bakkal dükkânını Mustafa Bey b. Mehmed’e üç yıl vade ile bey‘ bi’l-vefâ yoluyla sattığı
Havâss-ı aliyye kazâsı muzâfâtından Hasköy nâm kasaba sâkinlerinden Portakal cemâ‘atinden Masko v. İsrâyil nâm Yahudi meclis-i şer‘-i şerîfde kasaba-i mezbûrede vâki‘ Istabl-ı âmirede hâlen tavîleci başı olan işbu râfi‘ü’l-vesîka Mustafa Bey b. Mehmed nâm kimesne mahzarında ikrâr ve i‘tirâf edip kasaba-i mezbûrede vâki‘ iki tarafı kendi mülküm ile ve bir tarafı karındaşım Haron nâm Yahudi mülkü ile ve bir tarafı tarîk-i âm ile mahdûd ve mümtâz iki bâb mülk bakkāl dükkânımı târih-i kitâb şehri gurresinden üç sene tamâmına te’cîl ile mezbûr Mustafa Bey’e bey‘ bi’l-vefâ ile yüz yirmi riyâlî kebîr guruşa bey‘ edip mezbûr Mustafa Bey dahi vech-i muharrer üzre iştirâ ve kabûl eyledikden sonra kabz-ı semen-i ma‘dûd ve teslîm-i mebî‘-i mahdûd eyledim dedikde mukırr-ı mezbûr Masko’nun vech-i meşrûh üzre cârî ve sâdır olan ikrârını el-mukarru lehü’l-mezbûr Mustafa Bey vicâhen tahkīk ve şifâhen tasdîk edicek mâ vaka‘a bi’t-taleb ketb olundu. Hurrire fi’l-yevmi’l-hâdî ve’l-ışrîn min şehri Cumâdelûlâ li sene isneyn ve hamsîn ve elf.
Şuhûdü’l-hâl: Abdurrahim Çelebi er-Râcil, Mehmed b. Abdullah, Münir b. Abdullah, Mustafa b. Mehmed, Yahya b. İbrahim, Muzaffer Hoca el-İmâm, Nebi b. Yusuf, Hasan b. Abdullah, Mehmed Halîfe el-Müezzin, Ali b. Abdullah el-muhzır ve gayruhüm mine’l-hâzırîn
|