.:: İstanbul Kadı Sicilleri ::.


Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 377
Hüküm no: 537
Orijinal metin no: [290-3]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Masko v. İsrâyil’in mülk mahzenini Mustafa Bey b. Mehmed’e iki yıl vade ile sattığı (bey‘ bi’l-vefâ)

Havâss-ı aliyye -humiyet ani’l-beliyye- kazâsı tevâbi‘inden Hasköy nâm kasaba sâkinlerinden Portakal cemâ‘atinden Masko v. İsrâyil nâm Yahudi meclis-i şer‘-i şerîfde kasaba-i mezbûrede vâki‘ Istabl-ı âmirede hâlen tavîleci başı olan Mustafa Bey b. Mehmed nâm kimesne mahzarında bi’t-tav‘i’s-sâf ikrâr ve i‘tirâf edip kasaba-i mezbûrede vâki‘ iskele kurbunda bir tarafı karındaşım Haron mülkü ile ve bir tarafı yine kendi mülküm ile ve bir tarafı sâhil-i bahr ile ve bir tarafı tarîk-i âm ile mahdûd ve mümtâz olan bir bâb mülk mahzenimi târih-i kitâb şehri gurresinden iki sene [291] tamâmına te’cîl ile mezbûr Mustafa Bey’e bey‘ bi’l-vefâ üzre yüz kırk riyâlî kebîr guruşa bey‘ edip ol dahi vech-i muharrer üzre iştirâ ve kabûl eyledikden sonra kabz-ı semen ve teslîm-i müsemmen kıldım dedikde, mukırr-ı mezbûrun vech-i meşrûh üzre cârî olan ikrârını el-mukarru lehü’l-mezbûr vicâhen tahkīk ve şifâhen tasdîk edicek mâ vaka‘a bi’t-taleb ketb olundu. Hurrire fî gurreti Cumâdelûlâ li sene 1052.


Şuhûdü’l-hâl: Mustafa Efendi el-İmâm, Mahmud Çelebi b. Mehmed serrâc-ı hâssa, Mehmed Halîfe b. İbrahim el-Müezzin, Abdurrahim Çelebi er-Râcil, Abdullah Halîfe b. Hasan, Ali Beşe b. Ahmed, Ali b. Abdullah el-muhzır ve gayruhüm mine’l-hâzırîn