|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 376 Hüküm no: 536 Orijinal metin no: [290-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Kenar bt. Derviş’in ev hissesi ile arsasını Ali b. Abdullah’a sattığı
Havâss-ı aliyye tevâbi‘inden Hasköy mahallâtından Abdüsselam mahallesi sâkinelerinden Kenar bt. Derviş nâm Nasrâniyye tarafından husûs-ı âti’l-beyânı bey‘a vekîl olup mezbûreyi ma‘rifet-i şer‘iyye ile ârifân olan Dilâver Bey b. Abdullah ve Yusuf Bey b. Abdullah nâm kimesneler şehâdetleri ile sâbitü’l-vekâle olan zevci Norli v. Zefi nâm zimmî meclis-i şer‘-i şerîfde işbu râfi‘ü’l-vesîka Ali b. Abdullah nâm kimesne mahzarında bi’l-vekâle ikrâr ve i‘tirâf edip mahalle-i mezbûrede vâki‘ bir tarafı Fâtıma bt. Abdullah nâm hâtun mülkü ile ve bir tarafı Mustafa Ağa mülkü ile ve bir tarafı benim taht-ı tasarrufumda olan vakıf menzil ile ve bir tarafı tarîk-i âm ile mahdûd olup bir bâb tahtânî odayı zıllesiyle ve bir bâb ahırı ve bennâ zirâ‘ıyla kadri ma‘lûm arsa-i hâliyeyi muhtevî olan menzilden müvekkilim mezbûrenin kabza-i tasarrufunda olan mülk nısf hisse-i şâyi‘asını ve arsa-i mezbûreden tûlen otuz beş zirâ‘ ve arzan on altı zirâ‘ cem‘an elli bir zirâ‘ arsa-i hâliyesini vekâlet-i mahkiyyem hasebiyle mezbûr Ali’ye on bir bin nakd-i râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ edip kabz-ı semen ve teslîm-i müsemmen eyledim, ba‘de’l-yevm sâlifü’z-zikr nısf hisse-i menzil-i mezbûr ve arsa-i merkūme mezbûr Ali’nin mülk-i müşterâsıdır keyfemâ yeşâ ve yehtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Hurrire fi’l-yevmi’r-râbi‘ ve’l-ışrîn min şehri Cumâdelûlâ li sene isneyn ve hamsîn ve elf.
Şuhûdü’l-hâl: Mustafa Hoca el-İmâm, Mehmed b. Abdullah, Mirza b. Abdullah, Mustafa b. Mehmed, Yahya b. İbrahim el-Muhtesib, Abdünnebi b. Yusuf, Hüseyin b. Abdullah, Mehmed Halîfe b. İbrahim el-Müezzin, Ali b. Abdullah el-muhzır ve gayruhüm mine’l-hâzırîn Hasköy diye meşhûr bu mahkeme-i şerîfeye el-fakīr ilallâhi’l-ganiyyi’l-kadîr Ali’nin cülûsu a‘lemü’l-ulemâ’i’l-izâm efdalü’l-fuzalâ’i’l-fihâm Fenârîzâde diye şöhret bulan Hazret-i Şeyhî Mehmed Efendi -cu‘ıle’t-tekā zâdehû ve nâle murâdehû- zamânında vâki‘ oldu. Vaka‘a’t-tahrîr fî gurreti Cemâziyelâhir li sene isneyn ve hamsîn ve elf. Yâ fettâh, yâ rezzâk, yâ ganî, yâ muğnî
|