Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 386 Hüküm no: 553 Orijinal metin no: [300-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İbrahim b. Halil’in pereme satışından Ömer b. Abdullah’ta kalan alacağının tahsili Havâss-ı aliyye kazâsına tâbi‘ Hasköy sükkânından İbrahim b. Halil nâm kimesne mahfil-i kazâda Ömer b. Abdullah nâm kimesne mahzarında üzerine da‘vâ ve takrîr-i kelâm edip mezbûr Ömer zimmetinde târih-i kitâbdan bir sene mukaddem pereme semeninden bin beş yüz elli akçe hakkım olup meblağ-ı mezbûrdan üç yüz elli akçesini alıp bâkī zimmetinde bin iki yüz akçe hakkım kalmışdır, suâl olunup alıverilmesi matlûbumdur dedikde, gıbbe’s-suâl mezbûr Ömer cevâbında fi’l-vâki‘ târih-i kitâbdan bir sene mukaddem müdde‘î-i mezbûrdan bin beş yüz elli akçeye bir pereme iştirâ edip meblağ-ı mezbûrdan üç yüz elli akçesini kendiye teslîm edip bâkī zimmetimde bin iki yüz akçe dahi vardır deyû ikrâr ve i‘tirâf etmeğin ikrârı mûcebince meblağ-ı mezbûr bin iki yüz akçe müdde‘î-i mezbûra edâya mezbûr Ömer’e tenbîh [birle] mâ vaka‘a bi’t-taleb ketb olundu. Tahrîren fi’l-yevmi’s-sânî ve’l-ışrîn min Şevvâli’l-mükerrem sene 1052. Şuhûdü’l-hâl: Dilâver b. Abdullah, Yahya b. İbrahim, Musa b. Ömer, Ali b. Abdullah