Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 388 Hüküm no: 558 Orijinal metin no: [301-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Murad v. Kalak’ın Eğin’deki evini Arslan’a sattığı Vilâyet-i Anadolu’da Eğin kazâsı sükkânından Murad v. Kalak mahzarında bi’t-tav‘i’s-sâf ikrâr ve i‘tirâf edip Eğin nâm kazâda vâki‘ bir tarafı Şahbaz mülkü ve bir tarafı Derviş ve bir tarafı Mehmed Beşe mülkü ve bir tarafı hark ve bir tarafı Tader bağı ve bir tarafı Emerik bağı ve bir tarafı Meydan bağı [ile] mahdûd ve mümtâz olan mülk menzilimi mezbûr Arslan’a kâmil seksen beş riyâlî guruş [ve] yirmi riyâlî guruş kıymetli bârgir[i] bey‘-i bâtt-ı sahîh-i şer‘î ile bey‘ edip kabz-ı semen-i ma‘dûd ve teslîm-i mebî‘-i mahdûd eyledim ol dahi vech-i mübeyyen üzre iştirâ ve tesellüm eyledi, ba‘de’l-yevm zikr olunan menzil merkūm Arslan’ın mülk-i müşterâsıdır, keyfemâ yeşâ ve yehtâr mutasarrıf olsun dedikde mukırr-ı merkūmun [302] ikrâr-ı meşrûhunu el-mukarru lehü’l-mezbûr Arslan bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fî evâsıtı Zilka‘deti’ş-şerîfe sene isneyn ve hamsîn ve elf. Şuhûdü’l-hâl: Musa Çelebi b. Mehmed, Ali b. Abdullah, Mehmed b. Mahmud, Ferhad v. Şahbaz, Kazran v. Şahbaz, Hazar v. Sefer, Kömican v. Sefer