Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 389 Hüküm no: 559 Orijinal metin no: [302-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İshak v. Yasef’in Rus asıllı kölesini sattığı Havâss-ı aliyye kazâsına tâbi‘ Hasköy sükkânından İshak v. Yasef nâm Yahudi tarafından bey‘-i husûs-ı âti’l-beyânı ikrâra vekîl olup vekâleti Mosi nâm Yahudi, Yani v. Samariyye, Papas Yani [v.] Kiryaki nâm zimmîler şehâdetleriyle vekâleti sâbite olan mezbûr Mosi meclis-i şer‘-i şerîf-i hatîr-i lâzımü’t-tevkīrde işbu râfi‘ü’l-kitâb Yani v. Samariyye, Papas [Yani] v. Kiryaki mahzarında bi’t-tav‘i’s-sâf takrîr-i kelâm edip müvekkilim İshak’ın silk-i mülkünde olan Andriya v. Ota açık kaşlı kara gözlü bu sıfat ile mevsûf olan Rûsiyyü’l-asl Andriya’ya vekâletim hasebiyle İstanbul’da Tekfur Sarayı kurbunda Çakır mahallesi sâkinlerinden Todori v. Nikola’ya otuz beş riyâlî guruşa bey‘ edip semen-i mezbûru müşterî-i merkūmun yedinden bi’t-tamâm ve’l-kemâl aldım kabz eyledim dedikde el-mukarru lehü’l-mezbûr Todori bi’l-muvâcehe tasdîk ve bi’l-müşâfehe tahkīk edicek alâ mâ hüve’l-vâki‘ bi’t-taleb ketb olundu. Tahrîren fî evâhiri Zilka‘deti’ş-şerîfe [li] sene isneteyn ve hamsîn ve elf. Şuhûdü’l-hâl: Kemal v. Koydali?, Yani v. Estadi, Kurd v. Estad, Hristo v. Miho, Ostre v. Mişo, Neftere v. Nikola