Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 395 Hüküm no: 572 Orijinal metin no: [307-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vakfa borcu olduğu halde ölen Dimitri’den geriye mal kalmadığı Bi’l-fi‘il Cafer Efendi Evkāfı’na mütevellî olan fahrü’l-akrân Mustafa Çavuş b. Abdullah nâm kimesne meclis-i şer‘-i şerîfde Hazret-i Ebâ Eyyûb el-Ensârî’ye tâbi‘ Hasköy sâkinelerinden Saltankoz bt. Koti ve kızı Reype bt. Dimitri nâm zimmîyyeler mahzarında takrîr-i da‘vâ edip bundan akdem mürd olan mezbûr Saltankoz’un zevci merkūm Dimitri’nin zimmetinde vakf-ı mezbûr akçesinden yirmi bin akçe olup rehini dahi ihrâk olup hâlen mezbûrlar mürd-i merkūmun metrûkâtına vâzı‘atü’l-yed oldukları ecilden meblağ-ı mezbûru zikr olunan mürd-i mezbûrun metrûkâtından taleb ederim dedikde, mezbûretânlar dahi mürd-i merkūmdan bir akçe ve bir habbe kalmadığına yemîn bi’l-İncîl teklîf olundukda mezkûre zimmîyyeler yemîn bi’l-İncîl eyleyip mâ hüve’l-vâki‘ gıbbe’t-taleb ketb ü imlâ olundu. Tahrîren fî evâhiri Zilka‘de sene ihdâ ve ışrîn ve elf. Şuhûdü’l-hâl: İbrahim Hoca el-İmâm, Müezzin b. Ali, Kasım b. Ali, Hüsrev b. Abdullah, Hüseyin b. Veli ve gayruhüm