Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 40 Hüküm no: 4 Orijinal metin no: [2-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. ..? Mehmed Beşe’nin vârislerinin miras hisseleri hakkındaki ihtilafları ve sulh oldukları Husûs-ı âti’l-beyânı[n] mahallinde tahrîri iltimâs olunmağın bu fakīr zeyl-i vesîkada muharrerü’l-esâmî olan müslimîn [ile] Havâss-ı Aliyye kazâsı müzâfâtından kasaba-i Hasköy’de Kiremitçi Ahmed Çelebi mahallesinde sâkin es-Seyyid Ahmed Efendi b. Hasan nâm kimesne menziline varıp akd-i meclis-i şer‘-i şerîf olundukda meclis-i ma‘kūd-ı mezkûrda kasaba-i mezbûre mahallâtından Turşucu mahallesinde sâkin iken bundan akdem fevt olup verâseti zevce-i metrûkesi [3] Âişe bt. Mehmed ile li-ebeveyn kız karındaşı diğer Âişe bt. Hasan’a münhasıra olan Mehmed Beşe’nin zevcesi mezbûre Âişe meclis-i merkūmda müteveffâ-yı mezbûrun kız karındaşı diğer Âişe tarafından husûs-ı âti’l-beyânı tasdîke vekîl olup mezbûrenin zâtını ma‘rifet-i şer‘iyye ile ârifân olan Mehmed Efendi b. Ahmed eş-şehîr bi Nakkaşzâde ve Hasan Beşe b. Abdullah nâm kimesneler şehâdetleri ile şer‘an vekâleti sâbite olan Abdülbâkī Efendi b. Ahmed nâm kimesne mahzarında bi tav‘ihâ ikrâr ve i‘tirâf edip zevcim müteveffâ-yı mezbûrun yirmi bir bin altı yüz akçe eder mahlût ve bir sîm hançer ve kasaba-i mezbûre mahallâtından Pîrî Paşa mahallesinde vâki‘ ma‘lûmü’l-hudûd menzil ve yine kasaba-i mezbûrede Sütlüce mahallesinde Keresteci Tekkesi kurbunda vâki‘ ma‘lûmü’l-hudûd bağ ve yine kasaba-i mezbûrede mârrü’z-zikr Turşucu mahallesinde vâki‘ ma‘lûmü’l-hudûd menzil ve bi’l-cümle ism-i mâl ıtlâk olunur terekesinden rub‘ hisse-i şâyi‘amı ve müteveffâ-yı mezbûrun zimmetinde mütekarrir ve ma‘kūdun aleyh olan yirmi bin akçe mehr-i müeccelimi taleb ve da‘vâ eylediğinde beynimizde müslimûn ve muslihûn tavassut edip beni müteveffâ-yı mezbûrun kız karındaşı müvekkile-i mezbûreye beş bin akçe vermek üzre beni sâlifü’z-zikr Turşucu mahallesinde vâki‘ menzil-i mezkûr üzerine alâ tarîki’t-tehârüc inşâ-i akd-i sulh eylediklerinde ben dahi sulh-i mezbûru kabûl ve bedel-i sulh olan sâlifü’z-zikr Turşucu mahallesinde vâki‘ menzil-i mezbûru ahz ü kabz ve meblağ-ı mezbûr beş bin akçeyi müvekkile-i mezbûreye edâ ve teslîm edip tereke-i müteveffâ-yı mezbûra müte‘allik âmme-i de‘âvîden her birimiz âharın zimmetini ibrâ-i âmm-ı kātı‘ü’n-nizâ‘la ibrâ ve iskāt eyledik dedikde mukırra-i mezbûrenin minvâl-i muharrer üzre sâdıra olan ikrârını vekîl-i merkūm Abdülbâkī Efendi [4] bi’l-muvâcehe tasdîk ve bi’l-müşâfehe tahkīk etmeğin mâ hüve’l-vâki‘ bi’t-taleb ketb olundu. Hurrire fi’l-yevmi’s-sânî aşer min şehri Şevvâli’l-mükerrem li sene hamsîn ve semânîn ve elf. Şuhûdü’l-hâl: es-Seyyid Ahmed Efendi b. es-Seyyid Hasan, Mehmed Efendi eş-şehîr bi Osmanzâde, Yusuf Ağa b. Hasan, Mustafa Beşe b. Câsim, Ahmed Bey b. Ali, Ahmed Efendi b. İsa, Dilâver Bey b. Abdullah, Mustafa Çelebi b. Mehmed, Yusuf Çelebi b. Mehmed, Mehmed Çelebi Kalenderî, Mahmud Çelebi b. Mehmed ve gayruhüm