Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 41 Hüküm no: 5 Orijinal metin no: [4-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mekdiye v. Salamon’un Macar asıllı câriyesi Robana bt. Dupar ile azatlık sözleşmesi (mükâtebe) yapması Havâss-ı Aliyye kazâsı müzâfâtından kasaba-i Hasköy’de Keçeci[ler] mahallesinde sâkin Hayim cemâ‘atinden Mekdiye? v. Salamon nâm Yahudi meclis-i şer‘-i hatîr-i lâzımü’t-tevkīrde kendi için rıkkıyyetini mu‘terife olan işbu orta boylu açık kaşlı ön dişi gedik Macariyyetü’l-asl râfi‘atü’s-sifr Robana bt. Dupar nâm câriye-i memlûkesi muvâcehesinde bi tav‘ihî ikrâr ve i‘tirâf edip mevsûfe-i mezbûre ile muttasıfe olan mezbûre Robana târih-i kitâbdan beş sene tamâmına değin bana istikāmet ile hizmet etmek üzre kitâbete kesip ol dahi minvâl-i muharrer üzre kitâbet-i merkūmeyi kabûl ve hizmet-i lâzımesini edâya mültezime oldukdan sonra cemî‘ malımdan âzâd ve i‘tâk olup sâir ahrâr-ı asliyyât gibi hürre olup üzerinde hakk-ı velâdan gayrı hakkım bâkī kalmasın dediğinde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Hurrire fi’l-yevmi’s-sâdi[s] aşer min şehri Şevvâli’l-mükerrem li sene hamsîn ve semânîn ve elf. Şuhûdü’l-hâl: Ahmed Efendi b. İsa, Yusuf Çelebi el-İmâm, Mustafa Bey b. Yaralı Bevvâb-ı Saray-ı sultâniyye, Mahmud Çelebi b. Mehmed, Ahmed Çavuş el-Muhzır, Mehmed b. ( ) ve gayruhüm