Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 45 Hüküm no: 10 Orijinal metin no: [9-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âişe bt. Mehmed’in Defterdar Mehmed Efendi Vakfı’ndan ödünç aldığı Husûs-ı âti’l-beyânın mahallinde tahrîri iltimâs olunmağın bu fakīr zeyl-i vesîka[da] muharrerü’l-esâmî olan müslimîn ile Havâss-ı Aliyye kazâsı müzâfâtından kasaba-i Hasköy’de Kiremitçi Ahmed Çelebi mahallesinde sâkin es-Seyyid Ahmed Efendi b. es-Seyyid Hasan nâm kimesne menziline varıp akd-i meclis-i şer‘-i şerîf olundukda yine kasaba-i mezbûre mahallâtından Turşucu mahallesinde sâkine Âişe bt. Tolan? Mehmed nâm hâtun meclis-i ma‘kūd-ı mezkûrda Hazret-i Ebâ Eyyûb Ensârî’de vâki‘ merhûm Defterdâr Mehmed Efendi vakfı’nın nukūduna bi’l-fi‘l mütevellî olan necl-i necîbleri olan râfi‘ü’l-kitâb diğer Mahmud Çelebi b. Mehmed nâm kimesne mahzarında bi tav‘ihâ ikrâr ve i‘tirâf edip mezbûr diğer Mahmud Çelebi yedinden mâl-ı vakf-ı merkūmdan yüz yirmi beş esedî guruş ahz ü kabz eylediğimden sonra mezbûr diğer Mahmud Çelebi bana yüz yirmisi bir guruş olmak vechi üzre kendi malından beş bin akçe dahi karz-ı hasen ikrâz ve def‘ ve teslîm edip ben dahi minvâl-i muharrer üzre istikrâz ve kabz edip mârrü’z-zikr mâl-ı vakf-ı mezbûr yüz yirmi beş esedî guruş ile beş bin akçe diğer Mahmud Çelebi’ye zimmetimde vâcibü’l-edâ ve lâzımü’l-kazâ deynimdir deyû bi tav‘ihâ ikrâr ve i‘tirâf etmeğin mâ hüve’l-vâki‘ bi’t-taleb ketb olundu. Hurrire fi’l-yevmi’s-sânî aşer min Şevvâli’l-mükerrem li sene hamsîn ve semânîn ve elf. Şuhûdü’l-hâl: es-Seyyid Ahmed Efendi b. es-Seyyid Hasan, Ahmed Efendi b. İsa, Abdülbâkī Efendi b. Ahmed, Mustafa Efendi b. Kasım, Osmanzâde Efendi, Yusuf Ağa b. Hasan, Mahmud Çelebi b. Mehmed ve gayruhüm