Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 44 Hüküm no: 9 Orijinal metin no: [8-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. İsmail’in kocası Ahmed b. Mustafa ile muhâlaa ile boşandıkları Havâss-ı Aliyye kazâsı müzâfâtından kasaba-i Hasköy mahallâtından Sütlüce mahallesinde sâkine Fâtıma bt. İsmail nâm hâtun meclis-i şer‘-i şerîf-i şâmihü’l-imâd ve mahfil-i dîn-i münîf-i râsihü’l-evtâdda zevc-i muhâlı‘ı hâfız-ı hâze’l-kitâb Ahmed b. Mustafa nâm kimesne mahzarında bi tav‘ihâ ikrâr ve i‘tirâf edip zevcim mezbûr Ahmed ile beynimizde adem-i zindegânemiz olmakla zimmetinde mütekarrir ve ma‘kūdun aleyh olan üç bin akçe mehr-i müeccelimden ve nafaka-i iddet-i ma‘lûmemden ve me’ûnet-i süknâmdan fâriğa olmak vechi üzre zevcim mezbûr Ahmed ile muhâla‘a-i sahîha-i şer‘iyye ile hul‘ olup ol dahi vech-i muharrer üzre hul‘-ı mezbûru kabûl eylediğinden sonra mezbûr Ahmed’in zimmetini mârrü’z-zikr üç bin akçe mehr-i müeccelim ve nafaka-i iddet-i ma‘lûmem ve me’ûnet-i süknâm da‘vâsından zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim eğer ba‘de’l-yevm benden asâleten veya vükelâmdan vekâleten husûs-ı mezkûra müte‘allik da‘vâ sudûr ederse lede’l-hükkâm mesmû‘a ve makbûle olmasın dedikde mukırra-i mezbûrenin sâdır olan ikrârını mezbûr Ahmed bi’l-muvâcehe tasdîk ve bi’l-müşâhede tahkīk etmeğin mâ hüve’l-vâki‘ bi’t-taleb ketb olundu. Hurrire fi’l-yevmi’s-sâmin ve’l-ışrîn min Şevvâli’l-mükerrem li sene hamsîn ve semânîn ve elf. Şuhûdü’l-hâl: Ahmed Efendi b. Ömer, Mehmed Efendi b. Mustafa el-İmâm, Mehmed Bey b. Ahmed, İsmail Beşe b. Mahmud, …? Mehmed b. Mustafa, diğer Mehmed b. Kemal, Receb b. Yunus, Mehmed b. Yunus, Mehmed b. Ramazan, Musa b. Mehmed ve gayruhüm