Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 52 Hüküm no: 21 Orijinal metin no: [17-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kiremitçi Ahmed Çelebi Vakfı’na ait cami, ev ve muallimhânede mütevellîsi tarafından yapılan tamiratın mâliyetinin keşf edildiği Havâss-ı Aliyye kazâsına tâbi‘ kasaba-i Hasköy’de vâki‘ merhûm Kiremitçi Ahmed Çelebi Câmi‘-i şerîfi vakfı’nın meşrûtiyyet üzre bi’l-fi‘l mütevellîsi olan râfi‘-ı hâze’l-kitâb es-Seyyid Mustafa Çelebi’nin babası ve tarafından husûs-ı âti’l-beyâna vekîli olup bimâ hüve nehcü’ş-şer‘î vekâleti sâbite olan el-Hâc Mahmud b. Hüseyin nâm kimesne meclis-i şer‘-i şerîfde takrîr-i kelâm ve ta‘bîr ani’l-merâm edip câmi‘-i mezkûrun mürûr-ı eyyâm ile ba‘zı mevâzi‘i ve imâma meşrût menzilin ve mu‘allimhânenin dahi ba‘zı mevâzi‘i ta‘mîr ve termîme muhtâc olmağla oğlum müvekkilim mütevellî-i mezbûr es-Seyyid Mustafa Çelebi izn-i hâkimü’ş-şer‘le bundan akdem ta‘mîr ve termîm etmişdi hâlâ üzerine varılıp harc u sarf eylediği akçenin mertebe-i tahammülü ba‘de’l-keşf ve’l-mu‘âyene ketb ü terkīm ve tahmîn olunmak bi’l-vekâle matlûbumdur dedikde bu fakīr ve hâssa mi‘mârlardan üstâd Sofu Ahmed Beşe b. Ahmed nâm kimesne ve sâir ebniye ve sukūf ahvâline vukūfu olup zeyl-i vesîkada muharrerü’l-esâmî olan bî-garaz müslimîn ile zikr olunan câmi‘-i şerîf ve menzil ve mu‘allimhânenin üzerlerine varılıp mi‘mâr-ı mezbûr keşf ve misâha eyledikde câmi‘in fevkānîsinde konulan kırk sekiz cam dokuz yüz altmış akçe ve bir cam teli iki yüz elli akçe ve iki pencere demiri iki yüz akçe ve bir pencere ma‘a çerçeve altı yüz akçe aşı boyası ve badana ve ba‘zı meremmât ber vech-i tahmîn iki bin beş yüz otuz altı akçe tûlen ve arzen mekteb duvarı sakfı ki altmış altı zirâ‘ın beher zirâ‘ı altışar akçeden on bin üç yüz akçe ve def‘aten tûlen ve arzen bi hesâb-ı satrancî kırk dört zirâ‘ mekteb sakfı akdarması beher zirâ‘ı beşer akçeden iki yüz yirmi akçe ve tûlen ve kadden mahlût taş duvarı altı zirâ‘ ki beher zirâ‘ı kırkar akçeden iki yüz kırk akçe ve tûlen ve arzen bi hesâb-ı terbî‘î yüz beş zirâ‘ menzil sakfının beher zirâ‘ı kırk beşer akçeden dört bin yedi yüz yirmi beş akçe ve tûlen ve arzen menzil tahta döşemesi ki kırk sekiz zirâ‘ eder beher zirâ‘ı ellişer akçeden iki bin dört yüz akçe ve menzil müceddeden iki dolap dört yüz akçe ve menziline hucurât ber vech-i tahmîn altı yüz akçe ve menziline iki pencere iki yüz akçe [18] ve menziline masandıra ber vech-i tahmîn bin akçe ve menziline iki pencere iki yüz akçe ve tûlen ve arzen bi hesâb-ı satrancî yüz otuz altı zirâ‘ menzil duvarının beher zirâ‘ı otuzar akçeden dört bin seksen akçe tûlen ve kadden bi hesâb-ı mezbûr on iki zirâ‘ tahta perdenin beher zirâ‘ı on ikişer akçeden yüz on dört akçe ve altı aded depe camı yüz yirmi akçe ve bir sâde oda kapısı müceddeden seksen akçe ve tûlen ve arzen bi hesâb-ı mezbûr döşemenin on iki buçuk zirâ‘ ki beher zirâ‘ı ellişer akçeden altı yüz yirmi beş akçe ve sekiz aded nerdüban ayağı dört yüz akçe ve tûlen ve arzen bi hesâb-ı mezbûr kırk iki zirâ‘ taş duvarın beher zirâ‘ı altmış akçeden iki bin beş yüz yirmi akçe ve tûlen ve kadden on yedi buçuk dolma duvarın beher zirâ‘ı otuzar akçeden beş yüz yirmi beş akçe ve üç aded direk yüz elli akçe ve tûlen ve kadden elli dört zirâ‘ tahta havlu beher zirâ‘ı on beşer akçeden sekiz yüz elli akçe ve su yoluna kurşun ve künk boru ber vech-i tahmîn dört bin beş yüz akçe ve tûlen ve kadden bi hesâb-ı mezkûr yirmi bir zirâ‘ kerpiç duvarın beher zirâ‘ı kırkar akçeden bin altı yüz kırk akçe ve tûlen ve kadden bi hesâb-ı mezbûr kırk dokuz zirâ‘ kerpiç duvarın beher zirâ‘ı beşer [akçeden] iki yüz elli akçe ve kapı üstü akdarması elli dört akçe ve tûlen ve arzen yüz on yedi zirâ‘ oda akdarması beş yüz yetmiş akçe ve dolap kapağı meremmâtı yüz altmış akçe ve meremmât-ı kaldırım ve maslak duvarı ber vech-i tahmîn beş yüz akçe ve sâir meremmât-ı lâzıme dokuz yüz doksan akçe ki cem‘an otuz altı bin altı yüz yetmiş dokuz akçeye bâliğ oldukda bundan ekal ve noksan ile olmaz deyû mi‘mâr-ı mezbûr ve sâir müslimîn-i mezkûrîn icmâ‘ ve ittifâk etmeğin mâ vaka‘a bi’t-taleb ketb olundu. Fi’l-yevmi’s-sâdis ve’l-ışrîn min Zilhicceti’l-harâm li sene hamsîn ve semânîn ve elf. Şuhûdü’l-hâl: Abdülbâkī Efendi el-İmâm, Mehmed Efendi el-İmâm, eş-Şeyh Ahmed Efendi, Mehmed Çelebi Kalenderî, Ramazan Bey b. Abdullah, Hüseyin Ağa b. Muharrem, Süleyman Çelebi b. Ramazan, Ali Çelebi b. Abdullah, Yusuf b. Abdullah, Abdullah b. Mehmed, Mehmed Bey b. Ali, Abdullah b. İbrahim ve gayruhüm