Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 52 Hüküm no: 20 Orijinal metin no: [16-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İshak Efendi b. Veli’nin evini zevcesi Neslihân Hâtun bt. Cafer’e sattığı Medîne-i Hazret-i Ebâ Eyyûb Ensârî mahallâtından Takyecibaşı mahallesinde sâkin fahrü’l-müderrisîn İshak Efendi b. Veli nâm kimesne meclis-i şer‘-i hatîr-i lâzımü’t-tevkīrde râfi‘atü’l-kitâb Neslihân bt. Cafer nâm hâtun tarafından vech-i âtî üzre tasdîke vekîl olup mezbûrenin zâtını ma‘rifet-i şer‘le ârifân olan Mehmed Çelebi b. Siyavuş ve Dilâver Bey b. Abdullah nâm kimesneler şehâdetleriyle hasm-ı câhid mahzarında şer‘an vekâleti sâbite olan müvekkile-i mezbûrenin zevci Abdullah Bey b. Abdülmennân nâm kimesne mahzarında ikrâr ve takrîr-i kelâm edip akd-i âti’l-beyânın sudûruna değin silk-i mülkümde münselik olup Havâss-ı Aliyye a‘mâlinden kasaba-i Hasköy mahallâtından Turşucuzâde mahallesinde vâki‘ bir tarafdan İsmihân Hâtun mülkü ve bir tarafdan Fâtıma Hâtun mülkü ve bir tarafdan Mehmed Bey nâm bevvâb-ı sultânî bağı ve bir tarafdan tarîk-ı âm ile mahdûd ve mümtâz olup bir bâb fevkānî oda ve sofayı ve üç bâb tahtânî oda ve bir sofa ve bir fırın ve mezbûre İsmihân Hâtun ile müşterek bi’r-i mâyı ve zât-ı eşcâr-ı müsmire ve gayrı müsmire bahçeyi ve kenîfi müştemil mülk menzilimi bi cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık müvekkile-i mezbûre Neslihân’a tarafeynden îcâb ve kabûlü hâvî bey‘-i kat‘î ile yüz altmış iki esedî guruşa bey‘ ve teslîm edip ol dahi vech-i muharrer üzre iştirâ ve tesellüm ve kabz eyledikden sonra semeni olan meblağ-ı merkūm yüz altmış iki esedî guruşu müşteriye-i mezbûre Neslihân yedinden tamâmen ahz ü kabz eyledim ba‘de’l-yevm menzil-i mahdûd-ı mezkûr müvekkile-i merkūme Neslihân’ın mülk-i müşterâsı olmuşdur keyfe mâ yeşâ’ ve yahtâr mutasarrıfe olsun dedikde mezbûr İshak Efendi’nin takrîrini vekîl-i mersûm Abdullah Bey bi’l-vekâle tasdîk ve bi’l-müşâfehe tahkīk etmeğin mâ vaka‘a bi’t-taleb ketb olundu. Hurrire fi’l-yevmi’l-hâdî ve’l-ışrîn min Zilhicceti’ş-şerîfe li sene hamsîn ve semânîn ve elf. Şuhûdü’l-hâl: Ahmed Çelebi b. Nasuh, Mustafa Çelebi b. Nasuh, Mehmed Beşe Debbağ, Hasan Beşe Debbağ, Ali Efendi el-İmâm, İbrahim Beşe Debbağ, Ali Çelebi el-Muhtesib, İbrahim Çelebi b. Dilâver, Mahmud Çelebi b. Mehmed ve gayruhüm