Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 59 Hüküm no: 29 Orijinal metin no: [22-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Bünyamin ile Sinyora’nın büyük annelerini kendi mallarından harcayarak baktıkları için vefâtından sonra miras için rahatsız edilmemeleri talebi Husûs-ı âti’z-zikrin mahallinde ketb ü terkīmi iltimâs olunmağın bu fakīr zeyl-i vesîkada muharrerü’l-esâmî müslimîn ile Havâss-ı Aliyye kazâsına tâbi‘ kasaba-i Hasköy’de Kiremitçi Ahmed Çelebi mahallesinde sâkin Bünyamin v. Yako nâm Yahudinin menziline varıp akd-i meclis-i şer‘-i mübîn olundukda merkūm Bünyamin ile li-ebeveyn kız karındaşı Sinyora nâm Yahudiyenin büyük anaları Tamare bt. Bâli nâm Yahudiye meclis-i ma‘kūd-ı mezkûrda işbu râfi‘ayi’l-vesîka merkūmân Bünyamin ve Sinyora muvâcehelerinde bi tav‘ihâ ikrâr ve takrîr-i kelâm edip mersûmân Bünyamin ve Sinyora târih-i kitâba gelince beni yedi senedir ki kendi mallarından infâk ve iksâ etmişlerdir ve benim ism-i mâl ıtlâk olunur kalîl ve kesîr ve kalîl ve hakīr bir şeyim yokdur eğer an-karîb helâk olursam mersûmân Bünyamin ve Sinyora benim metrûkâtım için rencîde olunmamak üzre takrîrim tahrîr olunması matlûbumdur dedikde fi’l-vâki‘ hâl-i kaziyye mezbûre Tamare’nin bâlâda bast ve tafsîl eylediği minvâl üzre olduğunu mahalle-i merkūme ahâlîsi ihbâr etmeğin mâ vaka‘a zabten li’l-makāl ketb ü terkīm olunup mezbûrân yedlerine vaz‘ olundu fi’l-yevmi’s-sânî ve’l-ışrîn min Muharremi’l-harâm li sene sitte ve semânîn ve elf. Şuhûdü’l-hâl: Mehmed Efendi [b.] Mustafa, Abdülbâkī Efendi, Mehmed Halîfe [b.] Abdülkādir, Musa Bey [b.] Mehmed, Mehmed odabaşı, Ali [b.] Abdullah, İbrahim [b.] Dilâver