Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 58 Hüküm no: 28 Orijinal metin no: [21-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Musa Paşa’nın kızları Rukiye, Hatice ve Rahime’nin İbrahim Ağa’nın kızı ile ev hissesi hakkındaki davaları için Mehmed Bey’i vekil tayin ettikleri Husûs-ı âti’l-beyânın mahallinde ketb ü tahrîri iltimâs olunmağın savb-ı şer‘den mevlânâ Abdülbâkī b. Ahmed irsâl olunup ol dahi zeyl-i vesîkada muharrerü’l-esâmî müslimîn ile Havâss-ı Aliyye kazâsına tâbi‘ kasaba-i Hasköy’de Pîrî Paşa mahallesi sâkinelerinden Rukiye ve Hatice ve Rahime benât-ı merhûm Musa Paşa’nın menzillerine varıp akd-i meclis-i şer‘-i şerîf olundukda mezbûrât Rukiye ve Hatice ve Rahime hanımlar meclis-i ma‘kūd-ı mezkûrda işbu hâmilü’l-kitâb Mehmed Bey b. Ali nâm kimesne mahzarında her biri takrîr-i kelâm ve ta‘bîr ani’l-merâm edip sâbıkan cebecibaşı olup bundan akdem vefât eden İbrahim Ağa’nın sulbiye kebîre kızı ve bi’l-inhisâr vârisesi olup gāibe ani’l-meclis olan ( ) nâm hâtun ile menzile müte‘allika da‘vâ-yı şer‘iyyemiz olmağla merkūmeden her birimiz hisselerimizi taleb ve da‘vâya ve ahz ü kabza ve sulh ve ibrâya ve kabz [ve] îsâlin mütevakkıf olduğu umûrun cümlesine tarafımızdan her birimiz mezbûr Mehmed Bey’i vekîl ve nâib-i menâb nasb ve ta‘yîn eyledik dediklerinde ol dahi vekâlet-i merkūmeyi kabûl ve merâsimini edâya ta‘ahhüd ve iltizâm eylediğini mevlânâ-yı mezbûr mahallinde tahrîr ba‘dehû meclis-i şer‘a gelip alâ vukū‘ihi [inhâ] ettikde mâ vaka‘a bi’t-taleb ketb olundu. Fi’l-yevmi’t-tâsi‘ min Muharremi’l-harâm li sene sitte ve semânîn ve elf. [22] [Şuhûdü’l-hâl:] Mahmud Bey ve Mustafa Bey ibney merhûm Musa Paşa, Mustafa Bey b. Mehmed Ağa, Ahmed Bey b. Hüseyin, İbrahim [b.] Dilâver, Mahmud b. Mehmed ve gayruhüm mine’l-huzzâr