Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 60 Hüküm no: 32 Orijinal metin no: [23-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Ağa b. Bâli’nin evini Ali Beşe b. Hasan’a sattığı Havâss-ı Aliyye kazâsına tâbi‘ Hasköy mahallâtından Keçeci mahallesi sâkinlerinden Mustafa Ağa b. Bâli nâm kimesne meclis-i şer‘-i enverde Ali Beşe b. Hasan nâm kimesne mahzarında ikrâr-ı tâm ve takrîr-i kelâm edip mahalle-i mezbûrede vâki‘ olup silk-i mülkümde münselik olan bir tarafdan Pîr Veli oğlu mülkü ve bir tarafdan mandıra ve bir tarafdan Topal Musa mülkü ve bir tarafdan tarîk-ı hâs ile mahdûd bir bâb fevkānî ve bir bâb tahtânî beyti ve eşcâr-ı müsmire ve gayrı müsmireyi ve bi’r-i mâyı müştemil mülk menzilimi tarafeynden îcâb ve kabûlü hâvî bey‘-i bâtt-ı sahîh-i şer‘î ile râyic fi’l-vakt beş bin beş yüz akçeye müşterî-i mezbûr Ali Beşe’ye bey‘ edip teslîm-i mebî‘ ettikden sonra semeni olan beş bin beş yüz akçeyi müşterî-i mezbûr Ali Beşe’nin yedinden ahz ü kabz eyledim ba‘de’l-yevm menzil-i mahdûd-ı mezkûr müşterî-i mezbûr Ali Beşe’nin mülk-i müşterâsıdır keyfe mâ yeşâ’ ve yahtâr mutasarrıf olsun dedikden sonra müşterî-i mezbûr Ali Beşe mukırr-ı mezbûr Mustafa Ağa’nın cârî ve sâdır olan ikrârını bi’l-muvâcehe tasdîk ve bi’l-müşâhede tahkīk etmeğin mâ hüve’l-vâki‘ bi’t-taleb ketb olunup yed-i tâlibe vaz‘ ve def‘ olundu. Hurrire fi’l-yevmi’r-râbi‘ ve’l-aşer min şehri Saferi’l-hayr li sene sitte ve semânîn ve elf. Şuhûdü’l-hâl: Mustafa Efendi b. Ramazan, İbrahim Beşe b. ..?, Mehmed Bey b. Ali, el-Hâc Halil b. Nebi, Mustafa b. Mehmed, İsmail b. Osman, İbrahim Çelebi b. Dilâver, Mahmud Çelebi b. Mehmed ve gayruhüm