Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 61 Hüküm no: 34 Orijinal metin no: [24-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hatice Hâtun bt. Yusuf Ağa’nın evini Tavâşî Hasan Ağa Vakfı’na istiğlâl yoluyla sattığı Havâss-ı Aliyye kazâsına tâbi‘ Hasköy mahallâtından Abdüsselâm mahallesi sâkinelerinden Hatice Hâtun bt. Yusuf Ağa meclis-i şer‘-i enverde işbu bâ‘isü’l-hurûf Tavâşî Hasan Ağa vakfı’na mütevellî olan Abdülbâkī Bey b. Mustafa nâm kimesne mahzarında ikrâr ve takrîr-i kelâm edip mahalle-i mezbûrda vâki‘ bir tarafı İsmihân Hâtun mülkü ve bir tarafı Ferhadoğlu mülkü ve tarafeyni tarîk-ı âm ile mahdûd fevkānî ve tahtânî büyût-ı müte‘addideyi müştemil mülk menzilimi bi cümleti’t-tevâbi‘ ve’l-levâhık mütevellî-i mezbûr Abdülbâkī Bey’e vakf-ı merkūm malından üç yüz esedî guruşa alâ tarîki’l-istiğlâl bey‘ ve teslîm edip ol dahi vech-i meşrûh üzre iştirâ ve tesellüm eyledikden sonra semeni olan meblağ-ı mezbûr üç yüz esedî guruşu mütevellî-i mezbûr Abdülbâkī Bey’in yedinden bi’t-tamâm ahz ü kabz edip ba‘de’t-tahliyye ve’t-tekābuz menzil-i merkūmu mütevellî-i merkūm Abdülbâkī Bey târih-i kitâbdan bir sene tamâmına değin kırk beş esedî guruşa bana îcâr ve teslîm eyleyip ben dahi istîcâr ve tesellüm ve kabz ve kabûl eyledim dedikde mütevellî-i mezbûr Abdülbâkī Bey mukırra-i mezbûre Hatice Hâtun’un ikrâr-ı meşrûhunu ba‘de’t-tasdîk i‘âde-i kelâm eyleyip mezbûre hâtunun zevci olup işbu hâzır bi’l-meclis olan Mustafa Ağa b. Ali nâm kimesne mahdûd-ı mezkûr menzilin derkine kefîldir suâl olunup takrîri tahrîr olunmak matlûbumdur dedikde gıbbe’s-suâl mezbûr Mustafa Ağa mahdûd-ı mezkûr menzilin derkine kefîl olduğunu ikrâr etmeğin mâ hüve’l-vâki‘ bi’t-taleb ketb olundu. Hurrire fi’l-yevmi’l-hâmis ve’l-aşer min şehri Saferi’l-hayr li sene sitte ve semânîn ve elf. [25] [Şuhûdü’l-hâl:] Osman Bey b. Mustafa, Mustafa Beşe b. Ömer, Mustafa Çelebi b. Mehmed, Ahmed b. Murtaza, Süleyman Efendi el-İmâm, Mustafa Efendi el-İmâm, el-Hâc Mustafa b. Abdullah, Ali Çelebi b. Abdullah, İbrahim Çelebi b. Dilâver ve gayruhüm