Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 62 Hüküm no: 36 Orijinal metin no: [25-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İsmihân bt. Abdullah’ın kocası İbrahim b. Ali ile muhâlaa ile boşandıkları Havâss-ı Aliyye kazâsına tâbi‘ Hasköy mahallâtından Turşucu mahallesi sâkinelerinden İsmihân bt. Abdullah nâm hâtun tarafından husûs-ı âti’l-beyânı ikrâra vekîl olup mezbûre[nin] zâtını ma‘rifet-i şer‘iyye ile ârifân olan Mehmed Çelebi b. Siyavuş ve Receb Beşe b. Mustafa nâm kimesneler şehâdetleri ile şer‘an vekâleti sâbite olan İbrahim b. Ali nâm kimesne meclis-i şer‘de mezbûrenin zevci olup işbu hâzır bi’l-meclis olan Nasuh Halîfe b. Ali nâm kimesne mahzarında bi’l-vekâle ikrâr ve takrîr-i kelâm edip müvekkilem mezbûre İsmihân’ın merkūm Nasuh Halîfe zimmetinde mütekarrir ve ma‘kūdun aleyh iki bin akçe mehrinden ve nafaka-i iddetinden geçip ve me’ûnet-i süknâsı kendi üzerine olmak üzre muhâla‘a-i sahîha-i şer‘iyye ile muhâla‘a olup ol dahi hul‘-ı mezbûru kabûl eyledikden sonra husûs-ı mezbûra ve gayrıya müte‘allik olan cemî‘ de‘âvîden birbirlerini ibrâ-i âm ve kātı‘ü’n-nizâ‘ ile ibrâ ve iskāt eylediler dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Hurrire fi’l-yevmi’s-sâmin aşer min şehri Saferi’l-hayr li sene sitte ve semânîn ve elf. Şuhûdü’l-hâl: Ali Efendi b. el-Hâc Mehmed, Ahmed Bey b. Musa, Abdurrahman b. Mehmed, İbrahim Hâce b. Murad, Osman b. İbrahim, Mehmed Çelebi b. Mustafa, Ali Beşe b. Mehmed, Sâlih Bey b. Abdullah, Mustafa b. Murad ve gayruhüm