Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 63 Hüküm no: 37 Orijinal metin no: [25-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hatice Hanım bt. Musa’nın yeniçerilerin 55. cemâatinin para vakfından ödünç aldığı ve evini rehin olarak verdiği Husûs-ı âti’l-beyânın mahallinde ketb ü tahrîr-i iltimâs olunmağın savb-ı şer‘den bu fakīr ve zeyl-i kitâbda muharrerü’l-esâmî olan müslimîn ile Havâss-ı Aliyye kazâsına tâbi‘ Hasköy mahallâtından Pîrî Paşa mahallesi sâkinelerinden fahrü’l-muhaddarât Hatice Hanım bt. Musa Paşa nâm hâtunun menziline varıp akd-i meclis-i şer‘-i şerîf eyledikde mahmiye-i İstanbul’da Âşık Paşa mahallesi sâkinlerinden olup elli beş cemâ‘atinin vakf-ı nukūduna bi’l-fi‘l mütevellî olan Mehmed Çelebi b. Mehmed nâm kimesne mahzarında bi’t-tav‘i’s-sâf ikrâr ve i‘tirâf edip târih-i kitâbdan mukaddem vakf-ı mezbûra vâcibü’l-edâ ve lâzımü’l-kazâ beş yüz yirmi guruş deynim olup ba‘dehû mâl-ı vakf-ı mezbûrdan mütevellî-i merkūm Mehmed Çelebi yedinden altmış beş guruş dahi istikrâz edip cem‘an beş yüz seksen beş guruş vakf-ı mezbûra deynim olmuşdur meblağ-ı mezbûrun mukābilinde mahalle-i mezbûrda vâki‘ inde’l-ahâlî ve’l-cîrân ma‘lûmü’l-hudûd Pîrî Paşa vakfı’ndan senede altmış akçe mukāta‘a ile tasarrufumda olan menzilimi mütevellî-i [26] mezbûra vakf-ı merkūmun mütevellîsi izni ile rehin vaz‘ edip teslîm eylediğimden sonra ol dahi irtihân ve kabz ve kabûl eyledi dedikde gıbbe’t-tasdîki’ş-şer‘î mezbûre Hatice Hanım i‘âde-i kelâm edip târih-i kitâbdan yüz elli yedi gün tamâmına dek meblağ-ı mezbûru mütevellî-i merkūm Mehmed Çelebi’ye edâ etmez isem karye-i mezbûre mahallâtından el-Hâc Şaban mahallesi sâkinlerinden Abdülbâkī Efendi b. Ahmed nâm kimesneyi mârrü’z-zikr menzilimi vakf-ı mezbûr mütevellîsi ma‘rifetiyle ve semen-i misli ile âhara bey‘ edip ve meblağ-ı mezbûr beş yüz seksen beş guruşu mütevellî-i mezbûr Mehmed Çelebi’ye edâ ve fazla kalırsa bana îsâl ve noksan gelirse yine biz tekmîl etmek üzre küllemâ azeltüke fe-ente vekîli üzre azl-i in‘izâlden masûn vekâlet-i devriyye ile tarafımdan vekîl ve nâib-i menâb nasb ve ta‘yîn eyledim dedikde anlar dahi vekâlet-i mezbûreyi kabûl ve hıdemât-ı lâzımesini edâya ma‘an müte‘ahhid olmağın mâ hüve’l-vâki‘ bi’t-taleb ketb olundu. Hurrire fi’l-yevmi’s-sâmin min şehri Saferi’l-hayr li sene sitte ve semânîn ve elf. Şuhûdü’l-hâl: Ramazan Bey b. Abdullah, Mehmed Bey b. Ali, Mehmed Çelebi b. Abdülkādir, Hüseyin Beşe b. Mehmed, Ahmed b. Hasan, Mustafa b. Mehmed, İbrahim b. Ahmed, Mehmed Beşe b. Hüseyin, Süleyman Çelebi b. Hüseyin ve gayruhüm