Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 65 Hüküm no: 39 Orijinal metin no: [27-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Süleyman Çelebi b. Ramazan’ın şikayeti üzerine kasaptan aldığı etin tartılarak fiyatının kontrol edildiği Havâss-ı Refî‘a müzâfâtından Hasköy nâm kasaba ahâlîsinden işbu bâ‘isü’l-kitâb Süleyman Çelebi b. Ramazan nâm kimesne mahfil-i kazâya kasab tâifesinden Küpeli nâm Yahudinin satıcısı Pako v. Arslan nâm Yahudi muvâcehesinde üzerine da‘vâ ve takrîr-i kelâm edip işbu târih-i kitâb günü kasab-ı merkūmdan iki buçuk vakıyye kuzu lahmı iştirâ edip def‘-i semen eylediğimde her bir vakıyyesine yirmi birer akçemi almışdır işbu müşâhede olunan lahm-ı kuzu vezn olunup takrîr-i tahrîr olunmak matlûbumdur dedikde zeyl-i kitâbda mastûrü’l-esâmî olan müslimîn huzûrunda zikr olunan lahm-ı kuzu vezn olundukda iki buçuk vakıyye gelip kıymeti kasab-ı merkūmdan suâl olundukda cevâbında lahm-ı kuzu vakıyyesini yirmi birer akçeye mezbûr Süleyman Çelebi’ye bey‘ eyledim ve âhara dahi böyle bey‘ ederim deyû bi tav‘ihî ikrâr ve i‘tirâf etmeğin mâ hüve’l-vâki‘ bi’t-taleb ketb olundu. Fi’l-yevmi’l-hâmis min evveli’r-Rabî‘ayn li sene sitte ve semânîn ve elf. Şuhûdü’l-hâl: Musa Ağa Zâbit-i kasaba, İbrahim Efendi b. Mustafa, İbrahim Çelebi b. Dilâver, Mehmed Çelebi [b.] Ahmed, Ebûbekir Efendi b. Mehmed, Ahmed b. Mehmed, Ali b. Mehmed, Mahmud b. Mehmed, Veli b. Ali