Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 64 Hüküm no: 38 Orijinal metin no: [26-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Paroya bt. Erican’ın evini yeniçerilerin 55. cemâatin para vakfına istiğlâl yoluyla sattığı Havâss-ı Refî‘a müzâfâtından Hasköy nâm kasaba mahallâtından Abdüsselâm mahallesinde sâkine Paroya bt. Erican nâm Nasrâniye meclis-i şer‘-i hatîr-i lâzımü’t-tevkīrde elli beş cemâ‘at yeniçerilerinin orta akçelerine mevkūf nukūda bi’l-fi‘l mütevellî olan işbu bâ‘isü’l-vesîka Mehmed Çelebi b. Mehmed mahzarında ikrâr-ı tâm ve takrîr-i kelâm edip mahalle-i merkūmede vâki‘ bir tarafdan Kostantin v. Oham nâm zimmî mülkü ve bir tarafdan Râbia Hâtun mülkü ve iki tarafdan tarîk-ı âm ile mahdûd tabaka-i selâseyi hâvî olup tabaka-i ulvîsinde bir bâb odayı ve tabaka-i vustâsında bir bâb odayı ve tabaka-i süflîsinde bir bâb odayı ve matbah odasını ve mahzeni ve kenîfi müştemil olan mülk menzilinde nısf-ı şâyi‘ hissemi mütevellî-i mezbûr Mehmed Çelebi’ye yüz esedî guruşa bi tarîki’l-istiğlâl bey‘ ve teslîm edip ol dahi mâl-ı vakf-ı mezbûr ile tarîk-ı mezkûr üzre iştirâ ve tesellüm ettikden sonra semeni olan meblağ-ı mezkûr yüz guruşu yedinden tamâmen ahz ü kabz edip ba‘de’t-tahliyyeti’ş-şer‘iyye târih-i kitâbdan sene tamâmına değin yine menzil-i mezkûru mütevellî-i mezbûrdan on sekiz esedî guruşa istîcâr ve kabz edip ol dahi vech-i muharrer üzre bana îcâr ve teslîm eyledi dedikde gıbbe’t-tasdîki’ş-şer‘î menzil-i mezkûrun derkine ve ücretine işbu hâzırân bi’l-meclis Mardoros v. Karaşta ve İspolyot v. Yorgi nâm zimmîler emr ve kabûlü hâvî kefâlet-i sahîhati’ş-şer‘iyye ile kefîl olmağın mâ vaka‘a bi’t-taleb ketb olundu. Fî yevmi’l-âşir min evveli’r-Rabî‘ayn li sene sitte ve semânîn ve elf. Şuhûdü’l-hâl: Ahmed Efendi b. Mustafa el-İmâm, Ahmed Çelebi b. Mehmed Efendi, İbrahim Çelebi b. Dilâver, Hüseyin Çelebi b. Mustafa, Mustafa b. Abdullah, Mehmed Halîfe b. ( ) el-Müezzin, Mehmed Çelebi b. Hüseyin, Şaban Çelebi b. Hüseyin