Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 74 Hüküm no: 58 Orijinal metin no: [35-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Gazer v. Rasnas’ın Rus asıllı kölesi İstefan v. Yuvan’ı azat ettiği Havâss-ı Refî‘a kazâsına tâbi‘ kasaba-i Hasköy ahâlîsinden Gazer v. Rasnas nâm zimmî tarafından ıtk-ı âti’l-beyânı ikrâra vekîli olup Receb Beşe b. Nasuh [ve] Süleyman Çelebi b. Abdullah nâm kimesneler şehâdetleri ile şer‘an vekâleti sâbit olan Ali Bey b. Abdurrahman nâm kimesne meclis-i şer‘-i hatîr-i lâzımü’t-tevkīrde müvekkil-i mezkûr Gazer için rıkkını mu‘terif olan uzun? boylu açık kaşlı sağ başının sağ yanı çalık sarı elâ gözlü Rûsiyyü’l-asl bâ‘is-i hâze’s-sifr İstefan v. Yuvan nâm zimmî muvâcehesinde bi’l-vekâle ikrâr ve takrîr-i kelâm edip müvekkil-i mezbûr Gazer mevsûf-ı mezbûr İstefan’ı malımdan âzâd ve sâir hürr-i asliyyîn arasına ilhâk ve âzâd eyledi mezbûr-ı mevsûf[un] mezbûr İstefan üzerinde hakk-ı velâdan gayrı hakkı bâkī kalmadı dedi dedikde vekîl-i mezbûr Ali Bey’in cârî ve sâdır olan ikrârını mevsûf-ı mezbûr İstefan vicâhen tasdîk ve şifâhen [tahkīk] etmeğin mâ hüve’l-vâki‘ bi’t-taleb ketb olundu. Fi’l-yevmi’t-tâsi‘ min Cemâziyelâhir li sene seb‘în ve semânîn ve elf. Şuhûdü’l-hâl: Musa Bey b. Mehmed Ağa, Mehmed Bey b. Ali, Mehmed Çelebi b. Abdülkādir, Dilâve[r] b. Abdullah ve gayruhüm mine’l-hâzırîn?