Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 74 Hüküm no: 59 Orijinal metin no: [36-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ekmekçi Peço’nun kaçan kiremitçinin emriyle çıraklarına verdiği ekmeğin parasını çıraklarından talep edemeyeceğine hükmedildiği Budur ki Hasköy ekmekçisi Peço nâm zimmî cânib-i şer‘a gelip yine kasaba-i mezkûreden kiremitçi ustası keferesi olan Boğday nâm zimmînin emri ile şâkirdi olan Varse v. Kazer ve Serkis v. Garabet nâm kimesnelere sekiz yüz yetmiş akçelik ekmek verdim şimdi Boğday firâr eyledi teslîm olandan taleb ederin dedikde mûceb-i fetvâ-yı şerîfe men‘ine oldukda tahrîr olundu ekmekçi men‘ olunduğu kayd şüd. Zeyd ekmekçi olan Amr’a akçesini benim üzerime lâzım olmak üzre şu kadar ay tamâmına dek hizmetkârlarım Bekir ve Bişr’e benim tarafımdan kendileri yemek için meccânen günde şu kadar akçelik ekmeğin ver akçesini ben vereyim demekle Amr dahi Bekir ve Bişr’in tarafından vech-i meşrûh üzre şu kadar akçelik ekmek verse hâlâ Amr Zeyd[’den] mütâlebe etmeyip mücerred elinize verdim teslîm eyledim deyû ikrâr etmeğin Bekir ve Bişr’den nesne almağa kādir olur mu beyân buyrula. El-cevâb: Olmaz. Ketebehû Ali el-fakīr Ufiye anhu.