Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 81 Hüküm no: 73 Orijinal metin no: [44-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Beşir Ağa’nın siyahî kölesi Bilal b. Abdullah’ı azat ettiği Havâss-ı Aliyye müzâfâtından kasaba-i Hasköy’de vâki‘ Tersâne Bahçesi demekle ma‘rûf Saray-ı hümâyûn ağalarından Beşir Ağa hazretlerinin taraf-ı şerîflerinden ıtk-ı âti’z-zikri ikrâra vekîl olup mezbûrun zâtı[nı] ma‘rifet-i şer‘iyye ile ârifân olan Mustafa b. Abdullah ve Halil b. Şaban nâm kimesneler şehâdetleri ile şer‘an vekâleti sâbite olan fahrü’l-akrân Şaban Bölükbaşı b. Hüseyin nâm kimesne meclis-i şer‘-i hatîr-i lâzımü’t-tevkīrde müvekkilim mezbûr Beşir Ağa’nın abd-i memlûkü olup rıkkına mukır ve mu‘terif olan işbu esvediyyü’l-asl hâmil-i hâze’l-kitâb Bilâl b. Abdullah mahzarında bi’l-vekâle ikrâr-ı tâm ve takrîr-i kelâm edip müvekkilim mezbûr Beşir Ağa mezkûr Bilâl’i hasbeten lillâhi’l-aliyyi’l-azîm ve taleben li-merzâti Rabbi’r-rahîm malımdan âzâd olsun dedikde i‘tâkan sahîhan şer‘iyyen ikrâr[an] sahîhan şer‘iyyen fe-sâra hürren ke-sâiri’l-ahrâri’l-asliyyîn zümresine idhâl ve idrâc eyledi ba‘de’l-yevm mezbûr Bilâl sâir harâir-i asliyyîn gibi hür olup üzerinde hakk-ı velâdan gayrı hakkım kalmadı dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb [olundu]. Tahrîren fi’l-yevmi’s-sânî aşer min mâhı Muharremi’l-harâm li sene seb‘în ve semânîn ve elf. Şuhûdü’l-hâl: Mehmed Çelebi b. İvaz, Mustafa Çelebi b. Bayram, Mehmed Çelebi b. Siyavuş, Mehmed Efendi b. Mustafa, Yusuf b. Mustafa, Ali Çelebi b. Dilâver Muhzır, İbrahim Çelebi b. Abdullah