Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 82 Hüküm no: 74 Orijinal metin no: [44-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan b. Abdullah’ın Haseki Sinan Ağa’nın elindeki Gürcü asıllı kölenin kendisine ait olduğu iddiasını ispat edemediği Husûs-ı âti’l-beyânın mahallinde tahrîri iltimâs olunmağın bu fakīr zeyl-i vesîkada mezkûrü’l-esâmî müslimîn ile Havâss-ı sultâniyye iktâ‘ından kasaba-i Hasköy’de Tersâne Bahçesi demekle ma‘rûf saray-ı hümâyûna varıp işbu bâ‘isü’l-kitâb Hasan b. Abdullah meclis-i şer‘-i şerîfde mefharü’l-eşbâh Sinan Haseki muvâcehesinde üzerine da‘vâ ve takrîr-i kelâm edip târih-i kitâbdan mukaddem velâyetimden sekiz kara sığır ineğim mukābelesinde mübâdele eylediğim Yusuf b. Abdullah Gürciyyü’l-asl abd-i memlûkümü elimden saltanat-ı aliyye tarafına vusûl bulduğumla sefîne içinde iken mezbûr Haseki Sinan Ağa benim abd-i memlûkümü fuzûlî benden bi gayrı hakkın ahz eylemişdi el-hâletü hâzihî mezbûrdan taleb ederim suâl olunup yedime red olunması matlûbumdur dedikde gıbbe’s-suâl ve akībe’l-inkâr müdde‘î-i mezbûrdan da‘vâsına mutâbık beyyine taleb olundukda ityân-ı beyyineden izhâr-ı acz ile cevâb vermeğin mezbûr Sinan Haseki Ağa’ya yemîn teklîf olundukda ol dahi yemîn billâhi’l-alî etmeğin mûcebince merkūm Hasan bî-vech mu‘ârazadan men‘ olunup mâ hüve’l-vâki‘ bi’t-taleb ketb olundu. Fi’l-yevmi’l- âşir mine’l-Muharremi’l-harâm li sene seb‘în ve semânîn ve elf. Şuhûdü’l-hâl: El-Hâc Hüseyin Haseki, Süleyman Haseki, Ali Ağa Kilercibaşı, Abdullah b. Abdullah, Hüseyin b. Abdullah