Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 83 Hüküm no: 76 Orijinal metin no: [45-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Beşe b. Bayezid’in Yako v. Avraham’da alacağı olduğu Mahmiye-i İstanbul’da Atmeydanı kurbunda sâkin olup mehterhâne tâifesinden olan bâ‘is-i hâze’l-kitâb Ali Beşe b. Bayezid nâm kimesne meclis-i şer‘-i hatîr-i lâzımü’t-tevkīrde Havâss-ı Aliyye kazâsına tâbi‘ kasaba-i Hasköy sükkânından Yako v. Avraham nâm Yahudi muvâcehesinde üzerine da‘vâ ve takrîr-i kelâm edip târih-i kitâbdan on ay mukaddem cihet-i karz-ı şer‘îden mersûm Yako zimmetinde yüz yetmiş iki guruş hakkım olup hâlâ suâl olunup alıverilmesi matlûbumdur dedikde gıbbe’s-suâl mersûm Yako cevâbında fi’l-hakīka müdde‘î-i mezbûr Ali Beşe’ye yüz yetmiş iki kıt‘a esedî guruşu [deynim] vardır deyû bi tav‘ihî ikrâr ve i‘tirâf etmeğin alâ mûceb-i i‘tirâfihî meblağ-ı mezbûr yüz yetmiş iki guruşu müdde‘î-i mezbûr Ali Beşe’ye edâ ve teslîme mersûm Yako’ya tenbîh birle mâ hüve’l-vâki‘ bi’t-taleb ketb olundu. Fi’l-yevmi’l-hâmis ve’l-ışrîn mine’l-Muharremi’l-harâm li sene seb‘în ve semânîn ve elf. Şuhûdü’l-hâl: Mehmed b. Musa, Ahmed Beşe b. Abdullah, Mehmed Çelebi b. Siyavuş