Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 82 Hüküm no: 75 Orijinal metin no: [45-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yorgi v. Yani’nin yanında çalıştığı peksimetçi Andonaki’den ücret alacağını dava ettiği ve sulh oldukları Mahrûse-i Galata’da Karaköy kapısı kurbunda sâkin olup peksimetçi tâifesinden Yorgi v. Yani nâm zimmî meclis-i şer‘de bâ‘is-i hâze’s-sifr Andonaki v. Manol nâm zimmî muvâcehesinde üzerine da‘vâ ve takrîr-i kelâ[m] edip târih-i kitâbdan sekiz ay mukaddem bir sene tamâmına değin mezbûr Andonaki’ye peksimetçilik san‘atında hizmet etmek üzre otuz yedi esedî guruşa nefsimi îcâr ol dahi istîcâr ve kabûl eylediğinden sonra ve yetmiş yedi senesinde dahi hizmet edip ücretimden bâkī zimmetinde üç esedî guruş ki cem‘an kırk esedî guruş ücret hakkımı da‘vâ eylediğimde ol dahi inkâr etmeğin ben dahi müdde‘âmı isbât sadedinde iken beynimizde münâza‘ât-ı kesîre vâki‘ olmuş idi el-hâletü hâzihî beynimize muslihûn tavassut edip meblağ-ı mezbûr otuz yedi esedî guruş da‘vâsından beni yetmiş yedi senesinde hakkım olan üç guruş üzerine inşâ-i akd-i sulh eylediklerinde ben dahi sulh-i mezbûru kabûl ve bedel-i sulh olan meblağ-ı mezbûr üç esedî guruşu mezbûr Andonaki yedinden tamâmen ahz ü kabz eyledim min ba‘d ba‘de’l-yevm mersûm Andonaki zimmetinde bir sene ücretimden müctemi‘ olan meblağ-ı mezbûr otuz yedi esedî guruşa müte‘allika âmme-i de‘âvî [ve] mütâlebâtdan mezbûr Andona[ki]’nin zimmetini ibrâ-i âmm-ı kātı‘ü’n-nizâ‘ ile ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Tahrîren fi’l-yevmi’s-sânî aşer min mâh-ı Muharremi’l-harâm li sene seb‘în ve semânîn ve elf. Şuhûdü’l-hâl: Mehmed Efendi el-Kâtib, Muhtesib Mehmed, İbrahim el-Muhzır, Ali el-Muhzır