Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 84 Hüküm no: 78 Orijinal metin no: [46-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Eski Anadolu Kazaskeri Mustafa Efendi’nin evini zevcesi Safiye Hâtun bt. Yahya Efendi’ye sattığı Havâss-ı Aliyye kazâsına tâbi‘ kasaba-i Hasköy mahallâtından Sütlüce’de Mahmud Ağa mahallesinde sâkin olup sâbıkan mesned nişîn-i sadr-ı Anadolu a‘lemü’l-ulemâ’i’l-mütebahhirîn efdalü’l-fuzalâ’i’l-müteverri‘în yenbû‘ü’l-fezâili ve’l-me‘âlî metbû‘ü’l-efâzıl ve’l-e‘âlî alemü’l-ilm ve’l-hüdâ menârü’l-fazli ve’t-tukā sa‘âdetlü Mustafa Efendi hazretlerinin taraf-ı şerîflerinden bey‘-i âti’z-zikri ikrâra vekîl olup vekâleti bimâ hüve nehcü’s-sübût şer‘an sâbite olan Kemaleddin Efendi b. Mehmed meclis-i şer‘-i hatîr-i lâzımü’t-tevkīrde müvekkil-i mûmâ-ileyh hazretlerinin halîle-i mükerremeleri sâhibet-i hâze’l-kitâb Safiye Hâtun bt. el-merhûm el-mebrûr Yahya Efendi tarafından ikrâr-ı âti’l-beyânı tasdîke vekîl olup vekâleti ber nehc-i şer‘î sâbite olan Ömer Çelebi b. Mehmed mahzarında bi’l-vekâle ikrâr ve takrîr-i kelâm edip akd-i âti’z-zikrin sudûruna değin müvekkilim mûmâ-ileyhin silk-i mülk-i sahîhinde münselik olup kasaba-i mezbûrede Pîrî Paşa vakfı’na beher sene altmış akçe mukāta‘ası olan yine Pîrî Paşa mahallesinde vâki‘ bir tarafdan Yusuf Efendi mülkü ve bir tarafdan Edneya nâm Yahudi mülkü ve bir tarafdan Saraylı Hatice nâm hâtun mülkü ve bir tarafdan tarîk-ı [47] âm ile mahdûd hâriciyyesi bir bâb fevkānî oda ve bir kahve odası ve dâhiliyyesi iki bâb fevkānî oda [ve] bir bâb tahtânî ve dehliz ve bir matbah ve bir kameriyeli tahta-bend ve bahçeyi ve kanavât-ı memlûke ile muharrer bir masura mâ[’] ile havluyu müştemil mülk menzilini bi cümleti’t-tevâbi‘ ve’l-levâhık sekiz yüz yirmi beş kıt‘a esedî guruşa tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile bey‘ ve teslîm ol dahi vech-i muharrer üzre iştirâ ve tesellüm ve kabûl eyledikden sonra semeni olan meblağ-ı mezbûr sekiz yüz yirmi [beş] esedî guruşu müvekkilim mûmâ-ileyh hazretleri müvekkile-i müşârün-ileyhâ yedinden bi’t-tamâm ve’l-kemâl ahz ü kabz eyledi min ba‘d menzil-i mahdûd-ı mezkûrda alâka ve medhali yokdur müvekkile-i müşârün-ileyhânın mülk-i müşterâları olmuşdur keyfe mâ yeşâ[’] ve yahtâr mutasarrıfe olsun dedi dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ aşer min Muharremi’l-harâm li sene tis‘în ve semânîn ve elf. Şuhûdü’l-hâl: Mehmed Çelebi b. Siyavuş, Ahmed Çavuş b. Mahmud, Mehmed Efendi b. Mustafa, İbrahim b. Dilâver, Ali el-Muhzır