Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 89 Hüküm no: 84 Orijinal metin no: [52-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Ağa b. Hüseyin Efendi’nin vârislerinin muhallefâtını Mehmed Ağa b. Yusuf’dan teslim aldıkları Saray-ı hümâyûnda Pîr Mehmed Ağa’nın hüccetidir. Husûs-ı âti’l-beyânı mahallinde istimâ‘ için bu fakīr zeyl-i kitâbda muharrerü’l-esâmî müslimîn ile Tersâne-i Âmire Bahçesi demekle ma‘rûf bahçeye varıp meclis-i şer‘ olundukda hadîka-i hâssada satıcı? hizmetinde iken bundan akdem vefât eden Kır demekle ma‘rûf Mehmed Ağa b. Hüseyin Efendi’nin verâseti li-ebeveyn karındaşı Mustafa Efendi ile kız karındaşı Safiye nâm hâtuna münhasıra olduğu şer‘an zâhir ve mütebeyyin oldukdan sonra kendi tarafından asâleten ve kız karındaşı tarafından vekâleten mezbûr Mustafa Efendi meclis-i ma‘kūd-ı mezkûrda müteveffâ-yı mezbûrun muhallefâtına vâzi‘u’l-yed olan umdetü’l-havâs ve’l-mukarrebîn bâ‘isü’l-kitâb Mehmed Ağa b. Yusuf mahzarında bi’l-asâle ve bi’l-vekâle ikrâr ve i‘tirâf edip mezbûr Pîr Mehmed Ağa mûrisim müteveffâ-yı mezbûr Kır Mehmed Ağa’nın ber mûceb-i defter kabz eylediği cemî‘ muhallefâtı mezbûr Pîr Mehmed Ağa yedinden bi’t-tamâm ahz ü kabz eyledim min ba‘d mûrisim müteveffâ-yı mezbûrun muhallefâtından yedinde bir şey kalmayıp husûs-ı mezbûra müte‘allik da‘vâdan mezbûr Mehmed, Pîr Mehmed Ağa’nın zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim ba‘de’l-yevm mûrisim müteveffâ-yı mezbûrun muhallefâtına müte‘allik benden veya vükelâmdan ve müvekkile-i mezbûre Safiye Hâtun tarafından asâleten ve vekâleten da‘vâ sudûr ederse ve zuhûr ederse lede’l-hükkâmi’l-kirâm istimâ‘ olunmaya dedikde gıbbe’t-tasdîki’ş-şer‘î [mâ vaka‘a kayd olundu.] Fî 26 min Safer sene [10]89. Şuhûdü’l-hâl: Fahrü’l-havâssi’l-mukarrebîn Hasan Ağa, Umdetü’l-emâcid İbrahim Ağa, Fahrü’l-akrân Mustafa Ağa, Ali Ağa b. ( ), Ahmed Çelebi b. ( ) Kâtib-i sır, Abdurrahman Ağa, Osman Ağa b. ( )