Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 88 Hüküm no: 83 Orijinal metin no: [51-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kilisenin ihtiyaçları için İstanbul Patriği Diyonis’in Mustafa Ağa’dan ödünç aldığı Husûs-ı âti’l-beyânı mahallinde tahrîri için bi’t-taleb mahkeme-i şerîfeden bu fakīr ve zeyl-i kitâbda muharrerü’l-esâmî olan müslimîn ile Tersâne-i Âmire Bahçesi demekle ma‘rûf bahçeye varıp akd-i meclis-i şer‘-i şerîf eyledikde Hazîne-i âmire’de hâlâ nevbetçibaşı olan fahrü’l-emâsil ve’l-akrân Mustafa Ağa meclis-i ma‘kūd-ı mezkûrda mahmiye-i İstanbul patriği olan kıdvetü’l-milleti’l-Mesîhiyye Diyonis v. ( ) nâm patrik muvâcehesinde ikrâr ve takrîr-i kelâm edip işbu târih-i kitâb günü mezbûr Diyonis kilise maslahatı için yedimden cihet-i deyn-i şer‘îden olmak üzre üç yüz altmış gün tamâmına değin bana edâ ve teslîm etmek üzre sekiz bin esedî guruş taleb edip ben dahi meblağ-ı mezbûru merkūm Diyonis’e def‘ ve teslîm edip ol dahi meblağ-ı mezbûru meclis-i ma‘kūd-ı mezkûrda ahz ü kabz eylemişdir suâl olunup takrîri tahrîr ve hüccet-i şer‘iyye olunup yedime verilmesi matlûbumdur dedikde gıbbe’s-suâl mezbûr Diyonis cevâbında fi’l-hakīka meclis-i ma‘kūd-ı mezkûrda mûmâ-ileyh Mustafa Ağa’dan cihet-i deyn-i şer‘î olmak üzre sekiz bin esedî guruş târih-i kitâb günü kilise maslahatı için karz-ı şer‘îden olmak üzre yedinden ahz ü kabz edip meblağ-ı mersûm zimmetimde vâcibü’l-edâ ve lâzımü’l-kazâ deynimdir deyû bi tav‘ihî ikrâr ve i‘tirâf eyledikden sonra gıbbe’t-tasdîk mûmâ-ileyh Mustafa Ağa meclis-i mezbûrda tekrâr i‘âde-i kelâm edip meblağ-ı mezbûru va‘de hulûlünde bana edâ ve teslîm etmek üzre mezbûr Diyonis’den kefîl taleb eylediğimde yedime kendi hattı ve hâtemini hâvî verdiği deyn temessüküne mastûrü’l-esâmî ve’l-eşhâs olan metrepolidler meblağ-ı mezbûra emr ve kabûlü hâviye kefâlet-i sahîha-i şer‘iyye ile kefîl ve zâmin olduklarından sonra yine meblağ-ı mezbûr 8000 esedî guruşa işbu hâzır-ı meclis olan Kurtuva cemâ‘atinden Aslan v. ( ) nâm Yahudi dahi kefîl ve zâmin kayd şüd. Fî 23 min Muharremi’l-harâm sene 1089. Şuhûdü’l-hâl: Bölükbaşı Hüseyin Bevvâb, Mehmed Çelebi ser-bölük, Hasan b. İsa, Hasan b. Memi, Hasan b. Memi, Mehmed b. Mehmed, Receb b. Ali, Osman Ağa [b.] Memi?, Osman Ağa