Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 95 Hüküm no: 97 Orijinal metin no: [57-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Müslüman olup karısından boşanan Mehmed b. Abdullah’ın çocuklarına nafaka vermesi gerektiği Havâss-ı Aliyye kazâsına tâbi‘ kasaba-i Hasköy’de Pîrî Paşa mahallesi sâkinelerinden ( ) bt. ( ) nâm Nasrâniye meclis-i şer‘-i şerîfde takrîr-i kelâm ve ta‘bîr ani’l-merâm edip mukaddemâ zevcim olup şeref-i İslâm ile müşerref olan Mehmed b. Abdullah beni talâk-ı bâ’in ile tatlîk etmekle mezbûr Mehmed’e tâbi‘ olmağla nâmı Ahmed olan sadrî sagīr oğlumun ve nâmı Hatice olan sadriye kızımın nafaka ve kisvesi ve sâir havâic-i lâzımeleri için babaları mezbûr Mehmed malından nafaka ve kisve bahâ takdîr olunmak murâdımdır dedikde sagīrân-ı mezbûrânın her birine babaları mezbûr Mehmed malından beher yevm her birine beşer akçe nafaka ve kisve bahâ takdîr olunup inde’l-ihtiyâc istidâneye ve vakt-i zaferde rücû‘a mezbûre ( ) izin verilip mâ hüve’l-vâki‘ bi’t-taleb ketb ü terkīm ve yed-i tâlibe vaz‘ olundu. Tahrîren fî 8 şehri Rebî‘ilâhir sene 1089. Şuhûdü’l-hâl: Halil Efendi b. Ömer, Bâli b. Mustafa, Ali Çelebi b. Abdurrahman, Dilâver Bey b. Abdullah, Abdullah Beşe b. Mehmed ve gayruhüm mine’l-huzzâr