Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 95 Hüküm no: 98 Orijinal metin no: [57-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İsak v. Yasef’in evini zevcesi Kalamire bt. Yasef’e sattığı Husûs-ı âti’l-beyânı mahallinde tahrîri iltimâs için bu fakīr ve zeyl-i kitâbda muharrerü’l-esâmî olan müslimîn ile Katalan cemâ‘atinden olup kasaba-i Hasköy mahallâtından Kiremitçi Ahmed Çelebi mahallesi sâkinlerinden olup iki seneden beri sâhib-i firâş ve meclis-i şer‘a huzûru müte‘azzir olan İsak v. Yasef nâm Yahudinin menziline varıp akd-i meclis-i şer‘-i şerîf eyledikde mezbûr İsak meclis-i ma‘kūd-ı mezbûrda zevcesi işbu bâ‘isetü’l-vesîka Kalamire bt. Yasef nâm Yahudiye muvâcehesinde ikrâr-ı tâm ve takrîr-i kelâm edip mahalle-i mezbûrede vâki‘ bir tarafı ba‘zan Mosi nâm Yahudi mülkü ve ba‘zan Avraham nâm Yahudi veresesi mülkleri ve bir tarafı David nâm Yahudi mülkü ve iki tarafı tarîk-ı âm ile mahdûd üç bâb fevkānî odaları ve dört bâb tahtânî odaları ve matbahı ve selâmlık ta‘bîr olunur sofayı ve iki bâb mahzeni ve mezbûr Avraham veresesi ile müşterek bi’r-i mâyı ve havluyu müştemil mülk menzilimi cemî‘ tevâbi‘ ve levâhıkı ve kâffe-i merâfıkı ile zevcem mezbûre Kalamire’ye bin altı yüz esedî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi minvâl-i muharrer üzre iştirâ ve kabz ve kabûl eyledikden sonra semeni olan meblağ-ı mezbûr bin altı yüz esedî guruşu zevcem mezbûre Kalamire yedinden bi’t-tamâm ahz ü kabz eyledim ba‘de’l-yevm menzil-i mahdûd-ı mezbûr zevcem mezbûre Kalamire’nin mülk-i müşterâsıdır keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Tahrîren fî 7 şehri Rebî‘ilâhir li sene 1089. Şuhûdü’l-hâl: Mehmed Çelebi b. Yusuf, Mehmed Çelebi b. İbrahim el-Muhtesib, Abdullah Beşe b. Mehmed, Hasan Çelebi b. Mustafa, Mehmed b. Şaban, Ali Çelebi b. Abdurrahman, Bayram v. İsak, İlya v. Kemal, Abraham v. Yasef, Şeban v. Avraham, Mihayil v. Mosi ve gayruhüm mine’l-huzzâr