Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 107 Hüküm no: 113 Orijinal metin no: [66-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Çelebi b. Mustafa’nın İsak v. Yasef’deki alacağının kefili olan Menahem v. Mosi’den tahsiline dâir Mahmiye-i İstanbul mahallâtından Çerağcı mahallesi sükkânından işbu bâ‘isü’l-kitâb Ahmed Çelebi b. Mustafa nâm kimesne Havâss-ı Aliyye kazâsına tâbi‘ kasaba-i Hasköy sükkânından Menahem v. Mosi nâm Yahudiyi meclis-i şer‘a ihzâr ve mahzarında takrîr-i da‘vâ edip gāib ani’l-meclis İsak v. Yasef v. İsak nâm Yahudi zimmetinde cihet-i karz-ı şer‘îden on sekiz buçuk esedî guruş hakkıma mezbûr Menahem Yahudi kefîl bi’l-mâl olmuşdur kefâletine binâen meblağ-ı mezbûru mezbûr Menahem Yahudiden taleb ederim suâl olunup alıverilmesi matlûbumdur dedikde gıbbe’s-suâl mersûm Menahem cevâbında fi’l-hakīka gāib ani’l-meclis mersûm İsak Yahudinin zimmetinde cihet-i karz-ı şer‘îden müdde‘î-i mezbûr Ahmed Çelebi’ye deyni olan meblağ-ı mezbûr on sekiz buçuk esedî guruşa kefâlet-i sahîha-i şer‘iyye ile kefîl bi’l-mâlım deyû bi’t-tav‘i’s-sâf ikrâr ve i‘tirâf etmeğin mûcebiyle meblağ-ı mezbûr on sekiz buçuk esedî guruşu müdde‘î-i mezbûr Ahmed Çelebi’ye edâ ve teslîme kefîl-i mezbûr Menahem Yahudiye tenbîh birle mâ hüve’l-vâki‘ bi’t-taleb ketb olundu. Tahrîren fi’l-yevmi’l-hâdî aşer min Cemâziyelâhir sene seb‘în ve semânîn ve elf. Şuhûdü’l-hâl: Abdullah Efendi b. Halil, Mehmed Çelebi b. İbrahim, Ali Çelebi b. Abdurrahman, İbrahim Çelebi b. Dilâver, Dilâver Bey b. Abdullah