Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 107 Hüküm no: 114 Orijinal metin no: [66-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şaban Beşe b. Receb’in Salamon v. Arslan’daki alacağının kefili olan Mosi v. Tursun’dan tahsiline dâir Mahmiye-i İstanbul mahallâtından Gedik Paşa mahallesi sükkânından işbu bâ‘isü’l-kitâb Şaban Beşe b. Receb nâm râcil Havâss-ı Aliyye kazâsına tâbi‘ kasaba-i Hasköy mahallâtından Kiremitçi Ahmed Çelebi mahallesinde sâkin Mosi v. Tursun nâm Yahudiyi meclis-i şer‘a ihzâr ve muvâcehesinde takrîr-i da‘vâ edip mezbûr Mosi Yahudinin dâmâdı olup gāib ani’l-meclis Salamon v. Arslan v. Salamon nâm Yahudinin zimmetinde cihet-i karz-ı şer‘îden yüz elli esedî guruş hakkım olup meblağ-ı mezbûr yüz elli esedî guruşa mezbûr Mosi emr ve kabûlü hâviye kefâlet-i sahîha-i şer‘iyye ile kefîl bi’l-mâl olmuş idi meblağ-ı mezbûru kefâletine binâen mezbûr Mosi Yahudiden taleb ederim dedikde gıbbe’s-suâl merkūm Mosi Yahudi cevâbında fi’l-hakīka dâmâdım olup gāib ani’l-meclis mersûm Salamon v. Arslan nâm Yahudi zimmetinde cihet-i karz-ı şer‘îden müdde‘î-i merkūm Şaban Beşe’ye deyni olan meblağ-ı mersûm yüz elli esedî guruşa emr-i kabûlü hâviye kefâlet-i sahîha-i şer‘iyye ile kefîl bi’l-mâl oldum deyû bi’t-tav‘i’s-sâf ikrâr ve i‘tirâf etmeğin mûcebiyle ba‘de’l-hükm mâ vaka‘a bi’t-taleb ketb olundu. Tahrîren fi’l-yevmi’s-sâdis ve’l-ışrîn min Cumâdelâhire li sene tis‘în ve semânîn ve elf. Şuhûdü’l-hâl: Mahmud Çelebi b. Mehmed, Mehmed Bey b. Ali, Mehmed Beşe b. Hüseyin, Ali b. Abdurrahman, İbrahim b. Dilâver, Abdullah Efendi b. Halil, Dilâver Bey b. Abdullah ve gayruhüm