Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 108 Hüküm no: 115 Orijinal metin no: [67-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Serkis v. Devletyar’ın Eğin kasabasındaki evini Mankasar v. Ağozar’a sattığı Vilâyeti Anadolu’da vâki‘ Eğin kasabası sükkânından olup hâlâ mahmiye-i İstanbul hısnı ebvâbından Fener kapısı dâhilinde Abdi Subaşı mahallesinde müsâferet vechi üzre mütemekkin Serkis v. Devletyar nâm Ermeni meclis-i şer‘-i şerîfde işbu râfi‘ü’r-rakīm Mankasar v. Ağozar nâm Ermeni muvâcehesinde ikrâr ve i‘tirâf edip silk-i mülk-i sahîhimde münselik olup kasaba-i mezbûrede vâki‘ bir tarafı Sebhal mülkü ve bir tarafı Anos mülkü ve bir tarafı dere ve bir tarafı tarîk-ı âm ile mahdûd bir bâb tahtânî odayı müştemil mülk menzilimi cemî‘ tevâbi‘ ve levâhıkı ile mezbûr Mankasar’a yirmi kıt‘a esedî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ edip ol dahi minvâl-i muharrer üzre iştirâ ve kabûl ve temellük eyledikden sonra semeni olan meblağ-ı mezbûr yirmi esedî guruşu yedinden bi’t-tamâm ahz ü kabz eyledim ba‘de’l-yevm menzil-i mahdûd-ı mezkûrda alâka ve medhalim yokdur mârrü’z-zikr menzili mahallinde zabt ve tasarrufa mezbûr Mankasar’ı tarafımdan taslît eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Tahrîren fi’l-yevmi’s-sâdis min Recebi’l-mürecceb li sene tis‘în ve semânîn ve elf. Şuhûdü’l-hâl: Mahmud Çelebi b. Mehmed, Ali Çelebi b. Abdurrahman, İbrahim Çelebi b. Dilâver, Mehmed Bey b. Ali, Bedros v. Mercan, Mardoros v. Habas, Moses v. Hobyar, Hanem v. Serkis ve gayruhüm