Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 110 Hüküm no: 119 Orijinal metin no: [68-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İbrahim b. Receb’in evini vâlidesi Şahnisa’ya sattığı Mahrûse-i Galata müzâfâtından kasaba-i Kasımpaşa mahallâtından es-Seyyid Ali mahallesi sükkânından İbrahim b. Receb nâm kimesne meclis-i şer‘-i hatîr-i lâzımü’t-tevkīrde vâlidesi bâ‘iset-i hâze’l-kitâb Şahnisa bt. Ramazan nâm hâtun tarafından bey‘-i âti’z-zikri tasdîke vekîl olup zât-ı mezbûreyi ma‘rifet-i şer‘iyye ile ârifân Osman b. Hüseyin ve İbrahim b. Ahmed nâm kimesneler şehâdetleri ile şer‘an vekâleti sâbite olan Ali Efendi b. Musa mahzarında ikrâr ve takrîr-i kelâm edip akd-i âti’z-zikrin sudûruna değin yedimde mülküm ve hakkım olup üç bâb tahtânî odaları ve sofayı ve zât-ı eşcâr-ı müsmire ve gayrı müsmire bahçeyi müştemil mülk menzilimi cümle tevâbi‘i ile vâlidem müvekkile-i mezbûreye yüz elli guruşa bey‘-i bâtt-ı sahîh-i şer‘î ile bey‘ ve teslîm ve semeni olan meblağ-ı mezbûru yedinden kabz eyledim min ba‘d menzil-i mahdûd-ı mezkûrda alâka ve medhalim yokdur vâlidem müvekkile-i mezbûrenin [mülk-i] müşterâsı olmuşdur keyfe mâ yeşâ’ ve yahtâr mutasarrıf olsun dedikde mukırr-ı mezbûrun [vech-i] meşrûh üzre cârî ve sâdır olan ikrârını kefîl-i mezbûr Ali Efendi vicâhen tasdîk ve şifâhen tahkīk edicek [mâ hüve’l-vâki‘ bi’t-taleb ketb olundu]. [Fî] 24 min Şevvâli’l-mükerrem sene [10]90. Şuhûdü’l-hâl: Abdülbâkī Efendi, Şaban b. ( ) el-Bevvâb?, es-Seyyid ..? b. es-Seyyid Ali, Mehmed Bey b. Ali