Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 112 Hüküm no: 125 Orijinal metin no: [71-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Davire b. İsayi’nin vefâtından sonra vârislerinin hak iddia ettikleri evin Davire tarafından sağlığında kız kardeşine satıldığı Havâss-ı Aliyye kazâsına tâbi‘ kasaba-i Hasköy mahallâtından Keçeciler mütemekkinelerinden olup bundan akdem hâlike olan Davire bt. İsayi nâm Yahudiyenin verâseti li-ebeveyn er karındaşı İsak nâm Yahudi ile ve li-ebeveyn kız karındaşları Kalamire ve Senyorvile nâm Yahudiyelere münhasıra olduğu şer‘an sâbit oldukdan sonra mezbûre Kalamire meclis-i şer‘de menzili âti’z-zikre vâzı‘atü’l-yed olduğu şer‘an sâbit olan bâ‘isetü’l-kabâle kız karındaşı mezbûre Senyorvile muvâcehesinde üzerine da‘vâ ve takrîr-i kelâm edip kız karındaşımız hâlike-i mezbûre Davire Yahudiyenin metrûkâtından olup mahalle-i mezbûrede vâki‘ bir tarafı Avraham ve bir tarafı İsak nâm Yahudiler mülkleriyle ve bir tarafı çukur bahçe ve taraf-ı âharı Manolaki nâm zimmî mülkü ile mahdûd dört bâb fevkānî ve bir bâb tahtânî odaları ve bir dehlizi ve bir bâb matbahı ve dört bâb kileri ve kenîfi ve havluyu müştemil mülk menzilinden bi hasebi’l-irsi’ş-şer‘î bana intikāl eden dört sehimden bir sehim hisse-i şer‘iyyemi mezbûre Senyorvile’den da‘vâ ederim suâl olunup ihkāk-ı hak olunmak taleb ederim dedikde gıbbe’s-suâl mezbûre Senyorvile cevâbında fi’l-hakīka menzil-i mezkûr kız karındaşımız hâlike-i mezbûre Davire’nin mülkü olup lâkin mezbûre Davire hâl-i hayâtında ve kemâl-i sıhhatinde târih-i kitâbdan bir sene mukaddem menzil-i mezkûru bana dört yüz esedî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ben dahi minvâl-i muharrer üzre iştirâ ve kabz ve kabûl eylediğimden sonra zimmetimde deyn olan semen-i mezbûr dört yüz esedî guruşu bana hibe-i sahîha-i şer‘iyye ile hibe ve temlîk edip ben dahi meclis-i hibede hibe-i mezbûreyi kabûl eyleyip menzil-i mezkûr bu vechile mülk-i müşterâm olmuşdur dedikde gıbbe’s-suâl müdde‘iye-i mezkûre kaziyye minvâl-i mübeyyen üzre olduğunu münkire olıcak mezbûre Senyorvile Yahudiyeden takrîrine mutâbık beyyine taleb olundukda kasaba-i mezkûre mahallâtından Kiremitçi Ahmed Çelebi mahallesi ahâlîsinden Baryam v. İsak ve Hanine v. Arslan ve Yasef v. Arslan nâm Yahudiler li ecli’ş-şehâde meclis-i şer‘a hâzırûn olup gıbbe’l-istişhâd fi’l-hakīka hâlike-i mezbûre Davire hâl-i hayâtında ve kemâl-i sıhhatinde târih-i kitâbdan bir sene mukaddem sâlifü’n-na‘t mülk menzilini bizim huzûrumuzda kız karındaşı mezbûre Senyorvile’ye dört yüz esedî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi vech-i muharrer üzre iştirâ ve kabz ve kabûl eyledikden sonra mezbûre Senyorvile Yahudiye zimmetinde deyn olan semen-i mezkûr dört yüz esedî guruşu kız karındaşı hâlike-i mezbûre Davire hibe-i sahîha-i şer‘iyye ile hibe ve temlîk edip ol dahi meclis-i hibede hibe-i mezbûreyi kabûl eyledi menzil-i mezkûr mezbûre Senyorvile Yahudiyenin bu minvâl üzre mülk-i mahzı olmuşdur biz bu husûsa bu vech üzre şâhidleriz şehâdet dahi ederiz deyû her biri edâ-yı şehâdet-i şer‘iyye eylediklerinde gıbbe ri‘âyet-i şerâiti’l-kabûl şehâdetleri hayyiz-i kabûlde vâki‘ olmağın müdde‘iye-i mezbûre Kalamire Yahudiye mu‘ârazadan men‘ birle mâ vaka‘a bi’t-taleb ketb olundu. Tahrîren fi’l-yevmi’l-hâmis min Zilhicceti’ş-şerîfe sene tis‘în ve semânîn ve elf. Şuhûdü’l-hâl: Mehmed Bey b. Ali, Abdullah Efendi b. Halil, Ali b. Abdurrahman, Dilâver Bey b. Abdullah, İbrahim b. Dilâver, Mahmud Çelebi b. Mehmed ve gayruhüm