Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 114 Hüküm no: 126 Orijinal metin no: [72-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Meryem bt. Bâli’nin zevci Mehmed b. Abdullah ile muhâlaa ile boşandıkları Havâss-ı Aliyye kazâsına tâbi‘ kasaba-i Hasköy mahallâtından Kiremitçi mahallesi sâkinelerinden olup İbrahim b. Dilâver ve Ali b. Abdurrahman ta‘rîfleriyle mu‘arrefe olan Meryem bt. Bâli nâm hâtun meclis-i şer‘-i hatîr-i lâzımü’t-tevkīrde zevc-i muhâlı‘ı işbu râfi‘ü’l-kitâb Mehmed b. Abdullah mahzarında ikrâr ve takrîr-i kelâm edip zevcim mezbûr Mehmed[’le] beynimizde hüsn-i zindegânemiz olmamağla zimmetinde mütekarrir ve ma‘kūdun aleyh olan beş bin beş yüz akçe mehr-i müeccelimden ve nafaka-i iddet ve me’ûnet-i süknâmdan mezbûr Mehmed’den hamlim olan veled dünyaya geldiğinde hîn-i vilâdetinden yedi seneye değin kendi malımdan infâk ve iksâ eylemek üzre zevcim mezbûr Mehmed[’le] muhâla‘a-i sahîha-i şer‘iyye ile muhâla‘a edip ol dahi hul‘-ı mezbûru kabûl eylediğinden sonra zevciyyete ve gayra müte‘allika âmme-i de‘âvî ve mütâlebâtdan ve eymân ve muhâsamâtdan her birimizin zimmetini ibrâ ve iskāt eyledik dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ aşer min Muharremi’l-harâm li sene tis‘în ve elf. Şuhûdü’l-hâl: Fahrü’l-akrân Mahmud Bey b. Mehmed Bey, Mustafa Çelebi [b.] Dilâver, es-Seyyid Mustafa Çelebi b. es-Seyyid Mehmed Çelebi, Halil b. Mehmed, Mustafa b. Mehmed, Hüseyin b. Abdullah