Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 115 Hüküm no: 128 Orijinal metin no: [73-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Ağa b. Ali Ağa’nın Beykoz’daki evini Abdullah Beşe b. Hüseyin’e sattığı Havâss-ı Aliyye kazâsına tâbi‘ kasaba-i Hasköy mahallâtından el-Hâc Şaban mahallesinde sâkin hâlâ Tersâne-i Âmire Bahçesi’nde usta olan fahrü’l-akrân Mehmed Ağa b. Ali Ağa meclis-i şer‘-i hatîr-i lâzımü’t-tevkīrde bâ‘isü’l-kitâb Abdullah Beşe b. Hüseyin nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin yedimde mülküm ve hakkım olup vilâyeti Anadolu’da Yoros kazâsına tâbi‘ kasaba-i Beykoz’da vâki‘ bir tarafdan es-Seyyid ( ) Efendi mülkü ve bir tarafdan Kenan b. Abdullah nâm kimesne mülkü ve bir tarafdan sâhil-i bahr ve bir tarafdan tarîk-ı âm ile mahdûd iki bâb fevkānî ve tahtânî odaları ve üç sofayı ve fırını ve limanı ve bi’r-i mâyı ve matbahı ve havluyu müştemil mülk menzilimi bi’l-cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık mezbûr Abdullah Beşe’ye tarafeynden îcâb ve kabûlü hâvî şurût-ı müfsideden ârî dört yüz esedî guruş ile ayn-ı muzî‘a adedi nâ-ma‘lûm bir kabza fülûsa bey‘-i bâtt-ı sahîh-i şer‘î ile bey‘ ve teslîm ve temlîk ol dahi vech-i muharrer üzre iştirâ ve tesellüm ve temellük ve kabûl eylediğinden sonra semeni olan meblağ-ı mezbûr dört yüz esedî guruşu mezbûr Abdullah Beşe yedinden bi’t-tamâm ve’l-kemâl ahz ü kabz eyledim min ba‘d menzil-i mahdûd-ı mezkûrda alâka ve medhalim yokdur müşterî-i mezbûr Abdullah Beşe’nin mülk-i müşterâsı ve hakk-ı sarîhi olmuşdur keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Hurrire fî gurreti Saferi’l-hayr sene tis‘în ve elf. Şuhûdü’l-hâl: Seyfullah Çelebi b. Abdurrahman Efendi, İbrahim Usta sâkin-i Beykoz, El-Hâc Yusuf Çelebi b. Hasan sâkin-i Beykoz, Mustafa Bey b. Ahmed el-Yesârî?, Abdullah Çelebi b. Mehmed Bey, Kahvecioğlu Mustafa, Uzun el-Hâc Ahmed b. Abdullah, Beykoz imâmı Mehmed Efendi