Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 115 Hüküm no: 129 Orijinal metin no: [73-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Ramazan’ın evinin Sultan İbrahim’in hasekilerinden Âişe Sultan’a satıldığı Havâss-ı Aliyye kazâsına tâbi‘ kasaba-i Hasköy mahallâtından Turşucuzâde mahallesinde sâkin Mehmed b. Ramazan meclis-i şer‘-i hatîr-i lâzımü’t-tevkīrde merhûm ve mağfûrun-leh Sultan İbrahim Hân -aleyhi’r-rahmetü ve’l-gufrân- hazretlerinin dördüncü hasekileri sâhibet-i hâze’l-kitâb umdetü’l-muhaddarât Âişe Sultan hazretlerinin bâhir-i iltizâmlarından menzil-i âti’z-zikri iştirâya ve def‘-i semene vekîl olup zâtlarını ma‘rifet-i şer‘iyye ile ârifân olan Baltacı Musa Bey [b.] Oruc ve el-Hâc Ebûbekir Bey b. Mahmud şehâdetleri ile hasm-ı câhid mahzarında şer‘an vekâleti sâbite olan fahrü’l-akrân Bilâl Ağa b. Abdullah mahzarında ikrâr ve takrîr-i kelâm edip akd-i âti’z-zikrin sudûruna değin yedimde mülküm ve hakkım olup mahalle-i mezbûrede vâki‘ bir tarafdan kayıkçı Mahmud mülkü ve bir tarafdan Abdurrahman Çelebi b. Mehmed nâm kimesne mülkü ve [74] tarafeyni tarîk-ı âm ile mahdûd olup tûlen yirmi dört buçuk zirâ‘ ve arzen on buçuk zirâ‘ ve bahçe tarafı altı buçuk zirâ‘ arsası olan bir bâb tahtânî oda ve bir kenîf ve eşcâr-ı müsmire ve gayrı müsmire bahçeyi müştemil mülk menzilimi bi’l-cümleti’t-tevâbi‘ ve’l-levâhık vekîl-i mezbûr Bilâl Ağa’ya seksen beş esedî guruşa tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile bey‘ ve teslîm edip vekîl-i mezbûr dahi müvekkile-i müşârün-ileyhâ hazretleri için vech-i muharrer üzre iştirâ ve tesellüm ve kabûl eyledikden sonra semeni olan meblağ-ı mezbûr seksen beş esedî guruşu müvekkile-i müşârün-ileyhâ hazretleri malından olmak üzre vekîl-i mezbûr yedinden bi’t-tamâm ahz ü kabz eyledim ba‘de’l-yevm menzil-i mahdûd-ı mezkûrda alâka ve medhalim yokdur müvekkile-i müşârün-ileyhâ hazretlerinin mülk-i müşterâsı ve hakk-ı sarîhi olmuşdur keyfe mâ yeşâ’ mutasarrıfe olsun dedikde vekîl-i mezbûr Bilâl Ağa mukırr-ı mezbûr Mehmed’in ikrârını bi’l-muvâcehe tasdîk ve bi’l-müşâhede tahkīk etmeğin [mâ hüve’l-vâki‘ bi’t-taleb kayd olundu]. Fî 9 min Saferi’l-hayr sene 1090. Şuhûdü’l-hâl: Ömer Çelebi b. Mustafa Çavuş, İbrahim Efendi b. Murad sâkin-i mahalle-i mezbûre, Ebûbekir Çelebi b. Sâlih, Ali Çelebi b. Abdurrahman