Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 124 Hüküm no: 142 Orijinal metin no: [80-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Harsole bt. Hayim’den miras kalan evdeki hisselerin vârislerden Sabatay v. Mihayil’e satıldığı Havâss-ı Aliyye kazâsına tâbi‘ kasaba-i Hasköy’de Kiremitçi Ahmed Çelebi mahallesinde sâkine iken bundan akdem hâlike olan Harsole bt. Hayim nâm Yahudiyenin verâseti zevc-i metrûkü Murdehay v. Yasef ile sadrî kebîr oğulları Menahem ve Yasef ve sadriye kebîre kızları Erhandepole ve Harsukali’ye münhasıra olup ba‘dehû kable’l-kısmet merkūm Yasef ile mersûme Harsukali dahi müte‘âkiben hâlikler olup verâsetleri babaları mesfûr Murdehay’a münhasıra ve tashîh-i mes’eleleri yirmi dört sehimden i‘tibâr olunup sihâm-ı mezkûreden on beş sehmi merkūm Murdehay’a ve altı sehmi mersûm Menahem’e ve üç sehmi dahi merkūme Erhandepole’ye isâbet ve intikāl eylediği lede’ş-şer‘i’l-mutahhar zâhir ve mütehakkik oldukdan sonra merkūm Murdehay ile mersûm Menahem asâleten ve merkūme Erhandepole zevci tarafından husûs-ı âti’l-beyâna vekîl olup hasm-ı münkir muvâcehesinde Efadevile v. Avraham ve İsak v. Salamon nâm Yahudiler şehâdetleriyle şer‘an vekâleti sâbite olan Menahem v. Paroh nâm Yahudi vekâleten meclis-i şer‘de işbu râfi‘ü’r-rakīm Sabatay v. Mihayil nâm Yahudi muvâcehesinde her biri bi’l-asâle ve bi’l-vekâle ikrâr-ı tâm ve takrîr-i kelâm edip mûrisimiz hâlik-i evvelin mülkü olup ba‘de helâkihî irsen bize isâbet ve intikāl edip mahalle-i mezbûrede vâki‘ iki tarafı merhûm Ganîzâde bahçesi demekle ma‘rûf bahçe ve bir tarafı ba‘zan Menahem nâm Yahudi vakfı olan menzil ve ba‘zan yine vakf-ı mezkûrdan olan arsa-i hâliye ve bir tarafı mekābir-i kefere [81] ve tarîk-ı âm ile mahdûd müşterek bi’r-i mâyı hâvî mülk arsa-i hâliyede olan hisse-i mezkûrelerimizi merkūm Sabatay’a dört bin iki yüz akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi ber vech-i muharrer iştirâ ve tesellüm ve kabûl eyledikden sonra semeni olan meblağ-ı mezkûr dört bin iki yüz akçeyi mersûm Sabatay yedinden bi’t-tamâm ahz ü kabz eyledik min ba‘d sâlifü’z-zikr arsa-i hâliye mesfûr Sabatay’ın mülk-i müşterâsıdır keyfe mâ yeşâ’ mutasarrıf olsun dediklerinde gıbbe’t-tasdîki’ş-şer‘î mâ vaka‘a ketb olundu. Fî evâsıtı şehri Rebî‘ilâhir li sene tis‘în ve elf. Şuhûdü’l-hâl: Mehmed Çelebi b. Siyavuş, Süleyman Çelebi b. Ramazan, Mehmed Bey b. Ali, Mehmed Çavuş b. Abdurrahman, Efendepola v. Avraham, Murdehay v. Salamon, Yako v. Yahuda, İlyazer v. Yahuda, Salamon v. Paroh, İsak v. Salamon