Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 125 Hüküm no: 143 Orijinal metin no: [81-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı İbrahim Çelebi’nin tasarrufundaki vakıf odaların Ahmed Çelebi b. Himmet’e ferâğ ve tefvîz edildiği Mahmiye-i İstanbul’da Vâlide hanı’nda sâkin el-Hâc İbrahim Çelebi b. ( ) tarafından husûs-ı âti’l-beyâna vekîl olup Abdülbâkī Efendi b. Ahmed ve Durmuş b. Yusuf nâm kimesneler şehâdetleriyle şer‘an vekâleti sâbite olan Mustafa Çelebi b. Hüseyin meclis-i şer‘de kasab tâifesinden olup kasaba-i Hasköy mahallâtından Pîrî Paşa mahallesinde sâkin Ahmed Çelebi b. Himmet mahzarında takrîr-i kelâm edip müvekkilim mezbûr el-Hâc İbrahim’in taht-ı tasarrufunda olup kasaba-i mezbûrede Kiremitçi Ahmed Çelebi mahallesinde vâki‘ el-Hâc Şaban vakfı’ndan inde’l-ahâlî ve’l-cîrân ma‘lûmü’l-hudûd on beş bâb odalarını yevmî bir akçe icâre-i müeccele ile bi izni’l-mütevellî mezbûr Ahmed Çelebi’ye yedi yüz yetmiş beş kıt‘a esedî guruş bedel-i ma‘lûma ferâğ ve tefvîz mezbûr Ahmed Çelebi dahi tefevvuz ve kabûl edip meblağ-ı mezbûr yedi yüz yetmiş beş guruşu mezbûr Ahmed Çelebi yedinden bi’t-tamâm ahz ü kabz edip zikr olunan odalara müte‘allik ve târih-i kitâba [değin] beynlerinde cârî olan ahz ü i‘tâ ve mu‘âmelât-ı şettâdan birbirlerinin zimmetini ibrâ-i âmm-ı kātı‘ü’n-nizâ‘la ibrâ ve iskāt-ı tâmm-ı râfi‘ü’l-hısâm ile iskāt eyledik dediklerinde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâdî ve’l-ışrîn min şehri Rebî‘ilâhir sene 1090. Şuhûdü’l-hâl: es-Seyyid Mahmud Çelebi b. ( ), Mahmud Çelebi b. Mehmed Efendi, Süleyman Çelebi b. Ramazan, Mehmed Ağa b. Ali, Ali b. Abdurrahman, İbrahim b. Dilâver, Mehmed Ağa b. Ali bahçe ustası, Hasan Beşe er-Râcil, el-Hâc Ali b. ( ) ve gayruhüm mine’l-huzzâr