Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 126 Hüküm no: 144 Orijinal metin no: [81-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Musa Bey b. Mehmed Paşa’nın ölen babasının kiremitçi kârhânesinde kiracısı olan Kirakoz v. Agop’ta kalan kira alacağını talep ettiği ve sulh oldukları Mahrûse-i Galata müzâfâtından kasaba-i Kasımpaşa mahallâtından Kulaksız mahallesi sükkânından fahrü’l-eşbâh Musa Bey b. el-merhûm Mehmed Paşa meclis-i şer‘de Havâss-ı Aliyye kazâsına tâbi‘ kasaba-i Hasköy mahallâtından Abdüsselâm mahallesi sükkânından Kirakoz v. Agop nâm Ermeni mahzarında üzerine da‘vâ ve takrîr-i kelâm edip mezbûr Kirakoz babam müteveffâ-yı mezbûrun kasaba-i Hasköy’de vâki‘ kiremitçiler kârhânesinde müste’cir olup hâl-i hayâtında beynlerinde muhâsebe gördüklerinde merkūm Kirakoz zimmetinde ba‘de külli’l-hesâb icâre-i mezbûreden altmış bin akçe bâkī kalmağın babam müteveffâ-yı merkūm vefât ettikde verâseti bana münhasıra olmağla meblağ-ı mezbûru mesfûr Kirakoz’dan taleb ve da‘vâ eylediğimde ol dahi bi’l-külliye inkâr etmekle beynimizde münâza‘ât-ı kesîre olmuş idi el-hâletü hâzihî muslihûn tavassut edip da‘vâ-yı mezbûreden beni kırk kıt‘a esedî guruş üzerine sulh eylediklerinde ben dahi sulh-i mezbûru kabûl ve bedel-i [82] sulh olan meblağ-ı mezbûr kırk kıt‘a esedî guruşu merkūm Kirakoz yedinden bi’t-tamâm alıp kabz edip husûs-ı mezbûra müte‘allik da‘vâdan mesfûr Kirakoz’un zimmetini ibrâ-i âmm-ı kātı‘ü’n-nizâ‘la ibrâ ve iskāt-ı tâmm-ı râfi‘ü’l-hısâm ile iskāt eyledim dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Tahrîren fi’l-yevmi’l-hâmis ve’l-ışrîn min şehri Rebî‘ilâhir li sene tis‘în ve elf. Şuhûdü’l-hâl: Pîrî Paşa imâmı İbrahim Efendi b. Murad, hamamcı Mehmed Çelebi b. İsmail der-hamam-ı Pîrî Paşa, Mehmed Çelebi b. Siyavuş, Ahmed Ağa b. el-Hâc Osman, Mehmed Beşe b. Abdullah, Süleyman Çelebi b. Ramazan, Mehmed Bey b. Ali, İbrahim Çelebi b. Dilâver, Ali Çelebi b. Abdurrahman