Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 127 Hüküm no: 146 Orijinal metin no: [82-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Harsole bt. Mihayil’in arsasını Sabatay v. Mihayil’e sattığı Havâss-ı Aliyye kazâsına tâbi‘ kasaba-i Hasköy mahallâtından Kiremitçi Ahmed Çelebi mahallesinde sâkine Harsole bt. Mihayil nâm Yahudiye tarafından bey‘-i âti’z-zikre vekîl olup Mosi v. Yahuda ve Salamon v. Paroh nâm Yahudiler şehâdetleriyle şer‘an vekâleti sâbite olan İlyazer v. Yahuda meclis-i şer‘-i hatîr-i lâzımü’t-tevkīrde mahalle-i mezbûre sükkânından Sabatay v. Mihayil nâm Yahudi muvâcehesinde bi’l-vekâle ikrâr-ı tâm ve takrîr-i kelâm edip müvekkilem mezbûre Harsole’nin mülkü olup mahalle-i mezbûrede vâki‘ iki tarafı merhûm Ganîzâde Bahçesi demekle ma‘rûf bahçe ve bir tarafı ba‘zan Menahem nâm Yahudi vakfı olan menzil ve ba‘zan yine vakf-ı mezkûrdan olan arsa-i hâliye ve bir tarafı mekābir-i kefere ve tarîk-ı âm ile mahdûd müşterek bi’r-i mâyı hâvî mülk arsa-i hâliyesini merkūm Sabatay’a iki bin dört yüz akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi ber vech-i muharrer iştirâ ve tesellüm ve kabûl eyledikden sonra semeni olan meblağ-ı mezkûr iki bin dört yüz akçeyi müvekkilem mezbûre Harsole müşterî-i merkūm Sabatay yedinden bi’t-tamâm [83] ahz ü kabz edip ba‘de’l-yevm sâlifü’z-zikr arsa mesfûr Sabatay’ın mülk-i müşterâsıdır keyfe mâ yeşâ’ mutasarrıf olsun dedi dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Tahrîren fi’l-yevmi’r-râbi‘ ve’l-ışrîn min şehri Rebî‘ilâhir li sene tis‘în ve elf. Şuhûdü’l-hâl: Mehmed Çelebi b. Ömer eş-şehîr bi Kalenderî, Mehmed Çavuş b. Abdurrahman, Ali Çelebi b. Abdurrahman, İbrahim Çelebi b. Dilâver, Dilâver b. Abdullah