Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 135 Hüküm no: 157 Orijinal metin no: [89-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rabia bt. Mustafa’nın kocası Ömer b. Ahmed ile muhâlaa ile boşandıkları Havâss-ı Aliyye kazâsına tâbi‘ kasaba-i Hasköy mahallâtından Abdüsselâm mahallesi sâkinelerinden Râbia bt. Mustafa nâm hâtun tarafından vekîl olup mezbûreyi ma‘rifet-i şer‘iyye ile ârifân olup mahalle-i mezbûre sâkinlerinden Ahmed Efendi b. Mustafa ve Mehmed Çelebi b. Siyavuş nâm kimesneler şehâdetleriyle şer‘an vekâleti sâbite olan Mehmed Çelebi b. Hasan nâm kimesne meclis-i şer‘-i hatîr-i lâzımü’t-tevkīrde zevci işbu râfi‘ü’l-kitâb Ömer b. Ahmed mahzarında bi’l-vekâle ikrâr ve takrîr-i kelâm edip müvekkilem mezbûre Râbia’nın zevci mezbûr Ömer zimmetinde mütekarrir ve ma‘kūdun aleyh olan üç bin fıddî râyic fi’l-vakt akçe mehr-i müecceli ve nafaka-i iddet-i mu‘ayyenesi ve me’ûnet-i süknâsı üzerlerine zevci mezbûr Ömer’e bedel-i hul‘ olmak üzre def‘ ve teslîm eylediği iki bin akçe üzerine zevci mezbûr Ömer ile muhâla‘a-i [90] sahîha-i şer‘iyye ile muhâla‘a edip ol dahi hul‘-ı mezbûru kabûl eylediğinden sonra zevciyyete ve târih-i kitâba gelince beynlerinde vâki‘ âmme-i mu‘âmelâta ve ahz ü i‘tâya müte‘allik cemî‘ de‘âvî ve mütâlebât ve eymân ve muhâsamâtdan her biri âharın zimmetini ibrâ-i âmm-ı kātı‘ü’n-nizâ‘la ibrâ ve iskāt-ı tâmm-ı râfi‘ü’l-hısâm ile iskāt eylediler dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fî selhi Cumâdelûlâ li sene tis‘în ve elf. Şuhûdü’l-hâl: Mehmed Çelebi b. Ömer eş-şehîr bi Kalenderî, Mahmud Çelebi b. Mehmed, Mustafa Çelebi b. İbrahim, Süleyman Çelebi b. Ramazan, Ahmed b. Hasan, İbrahim Çelebi b. Dilâver, Ali Çelebi b. Abdurrahman