Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 134 Hüküm no: 156 Orijinal metin no: [89-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hamya bt. İlya’nın boşandığı kocası Menahem v. Mosi’de olan alacakları için sulh oldukları Husûs-ı âti’l-beyânın mahallinde tahrîri iltimâs olunmağın bu fakīr zeyl-i kitâbda muharrerü’l-esâmî olan müslimîn ile Havâss-ı Aliyye kazâsına tâbi‘ kasaba-i Hasköy’de Kiremitçi Ahmed Çelebi mahallesi sâkinelerinden Hamya bt. İlya nâm Yahudiyenin sâkin olduğu menzile varıp akd-i meclis-i şer‘-i hatîr olundukda mezbûre Hamya’nın zâtını Evisay v. Yasef ve Efendepola v. Avraham nâm Yahudiler ma‘rifet-i şer‘iyye ile ârifân oldukdan sonra meclis-i ma‘kūd-ı mezbûrda zevc-i mutallıkı işbu hâzır bi’l-meclis Menahem v. Mosi nâm Yahudi muvâcehesinde ikrâr ve takrîr-i kelâm edip mezbûr Menahem zimmetinde mütekarrir ve ma‘kūdun aleyh olan yüz yirmi beş kıt‘a esedî guruş mehr-i müeccelim ve bin iki yüz akçe nafaka-i iddet-i mu‘ayyenem ve cihet-i karz-ı şer‘îden dahi elli kıt‘a esedî guruş ve sekiz buçuk guruşa dahi üç aded hâtem cem‘an zimmetinde yüz doksan üç buçuk guruş hakkım olmağla taleb eylediğimde beynimizde münâza‘ât-ı kesîre vâkı‘a olmuş idi el-hâletü hâzihî muslihûn tavassut edip meblağ-ı mezbûr da‘vâsından beni yüz kırk kıt‘a esedî guruş üzerine inşâ-i akd-i sulh ettiklerinde ben dahi sulh-i mezbûru kabûl ve bedel-i sulh olan meblağ-ı mezbûr yüz kırk kıt‘a esedî guruşu mezbûr Menahem yedinden bi’t-tamâm ve’l-kemâl alıp kabz edip ba‘de’l-yevm zevciyyete ve gayra müte‘allik âmme-i de‘âvî ve mütâlebât ve eymân ve muhâsamâtdan mezbûr Menahem’in zimmetini ibrâ-i âm ile ibrâ ve iskāt-ı tâm ile iskāt eyledim dedikde gıbbe’t-tasdîki’ş-şer‘î mezbûre Hamya’nın babası İlya v. Yahuda meclis-i ma‘kūd-ı mezbûrda takrîr-i kelâm edip târih-i kitâba gelince beynimizde cârî ve sâdır olan ahz ü i‘tâ ve mu‘âmelât-ı şettâdan ben dahi mezbûr Menahem’in zimmetini ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fî selhi Cumâdelûlâ li sene tis‘în ve elf. Şuhûdü’l-hâl: Mehmed Çelebi b. Siyavuş, Mehmed Çavuş b. Abdurrahman, Mehmed Bey b. Ali, Ali Çelebi b. Abdurrahman, İbrahim Çelebi b. Dilâver, Murdehay v. Salom, Yako v. Bünyamin, Salamon v. Paroh, Efendepola v. Avraham