Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 136 Hüküm no: 159 Orijinal metin no: [90-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kasandra bt. Dimitri’nin evini yeniçerilerin 55. cemâatinin para vakfına istiğlâl yoluyla sattığı Havâss-ı Aliyye kazâsına tâbi‘ kasaba-i Hasköy mahallâtından Kiremitçi Ahmed Çelebi mahallesi sâkinelerinden Kasandra bt. Dimitri nâm Nasrâniye meclis-i şer‘-i hatîr-i lâzımü’t-tevkīrde Dergâh-ı âlî yeniçerilerinin elli beşinci cemâ‘atinin nukūd-ı mevkūfesine bi’l-fi‘l mütevellî olan Mehmed Çelebi b. Mehmed mahzarında ikrâr ve takrîr-i kelâm edip mahalle-i mezbûrede vâki‘ bir tarafı Mihayil v. Yani nâm zimmî mülkü ve bir tarafı Maryola bt. Angeli nâm Nasrâniye mülkü ve bir tarafı sâhil-i bahr ve taraf-ı râbi‘i tarîk-ı âm ile mahdûd olup büyût-ı adîdeyi müştemil olan mülk menzilimi cümle tevâbi‘ ve levâhıkı ile mütevellî-i mezbûr Mehmed Çelebi’ye bin kıt‘a esedî guruşa bey‘-i sahîh-i şer‘î ile bey‘ ve teslîm ol dahi vakf-ı mezbûr malıyla bi tarîki’l-istiğlâl iştirâ ve tesellüm ve kabûl edip meblağ-ı mezbûr bin kıt‘a esedî guruşu mütevellî-i mezbûr Mehmed Çelebi yedinden bi’t-tamâm ve’l-kemâl alıp kabz eylediğimden sonra mezbûr Mehmed Çelebi menzil-i mahdûd-ı mezbûru gıbbe’t-tahliyyeti’ş-şer‘iyye ve’t-tekābuzi’l-mer‘î târih-i kitâbdan bir sene tamâmına değin beher mâh bin beş yüz akçe vermek üzre yüz elli kıt‘a esedî guruşa bana îcâr ve teslîm ben dahi vech-i muharrer üzre istîcâr ve kabûl eyledim dedikde gıbbe’t-tasdîki’ş-şer‘î derk-i menzil-i [91] mezbûra ve ücret-i merkūmeye ve asl-ı mâl-ı vakf-ı mezbûra merkūme Kasandra’nın sulbî kebîr oğlu Andonaki v. Manolaki nâm zimmî ile sulbiye kebîre kızı Ezmerağda nâm Nasrâniye her biri âharın zimmetine lâzım gelen meblağa emr ve kabûlü hâviye kefâlet-i sahîha-i şer‘iyye ile kefîl olduk dediklerinden sonra mezbûre Kasandra i‘âde-i kelâm edip meblağ-ı mezbûru müddet-i merkūme bir sene tamâmında mütevellî-i mezbûr Mehmed Çelebi’ye edâdan âcize olursam menzil-i mezbûru semeni misli ile bey‘a ve semeninden meblağ-ı mezbûr bin kıt‘a esedî guruşu mütevellî-i merkūma edâya ve fazlasını bana îsâl ve teslîme işbu hâzır bi’l-meclis Mustafa Beşe b. Yusuf nâm kimesneyi tarafımdan azl-i in‘izâlden masûn vekâlet-i devriyye ile vekîl nasb eyledim dedikde ol dahi vekâlet-i mezbûreyi kabûl ve merâsimini edâya müte‘ahhid olmağın mâ hüve’l-vâki‘ bi’t-taleb ketb olundu. Fi’l-yevmi’l-hâmis min Cumâdelâhire li sene tis‘în ve elf. Şuhûdü’l-hâl: Mustafa Çelebi b. Hasan, Sâlih Çelebi b. Yusuf, Mahmud Çelebi b. Mehmed, Süleyman Çelebi b. Ramazan, Mehmed Bey b. Ali, İbrahim Çelebi b. Dilâver, Ali Çelebi b. Abdurrahman, Dilâver Bey b. Abdullah