Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 137 Hüküm no: 160 Orijinal metin no: [91-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Harap durumdaki vakıf evin tamiri için bahçesinden ifrâz edilen arsanın Mehmed Çelebi b. Mehmed’e icâreteynle kiraya verildiği Havâss-ı Aliyye kazâsına tâbi‘ kasaba-i Hasköy mahallâtından Abdüsselâm Bey mahallesinde vâki‘ merhûm Abdullah Hâmidî nâm sâhibü’l-hayrın evvelâ zevcesi Ferahnâz nâm hâtuna ve evlâdına ve evlâd-ı evlâd-ı evlâdına ve ba‘de’l-inkırâz utekāsına ve evlâd-ı evlâd-ı evlâdına ve ba‘de’l-inkırâz zikr olunan Abdüsselâm Bey Mescid-i şerîfinin imâmına süknâ olmak üzre vakf eylediği menzilin bi’l-fi‘l mütevellîsi olan Ahmed Efendi b. Mustafa nâm kimesne meclis-i şer‘-i hatîr-i lâzımü’t-tevkīrde işbu râfi‘ü’l-kitâb Mehmed Çelebi b. Mehmed mahzarında bi’t-tevliyye ikrâr-ı tâm ve takrîr-i kelâm edip mahalle-i mezbûrede vâki‘ şark cânibi Emine Hâtun vakfı olan menzil ve kıble cânibi Pirinççibaşı Mehmed Ağa kızı mülkü ve bir tarafı ba‘zan mescid-i mezbûr ve ba‘zan mekābir-i müslimîn ve bir tarafı tarîk-ı âm ile mahdûd bir bâb beyt-i süflî ve bi’r-i mâyı ve eşcâr-ı müsmireyi hâvî bahçeyi ve havluyu müştemil olan vakıf menzil harâba müşrif olup kābil-i süknâ olmayıp meremmâta muhtâc olmağla vakfın dahi meremmâta müsâ‘adesi olmamağla şark cânibinden tûlen on zirâ‘ ve arzen on beş zirâ‘ bi hesâb-ı satrancî yüz elli zirâ‘ arsayı bahçesinden ifrâz olunup menzil-i mezbûrun meremmâtı için îcâr olunmak lâzım olmağın târih-i kitâbdan on buçuk esedî guruş icâre-i mu‘accele ve beher sene seksen akçe icâre-i müeccele ile mezbûr Mehmed Çelebi’ye tevliyyetim hasebiyle îcâr edip ol dahi minvâl-i muharrer üzre istîcâr ve kabûl eyledikden sonra zikr olunan on buçuk esedî guruş icâre-i mu‘accele[yi] mezbûr Mehmed Çelebi yedinden bi’t-tamâm vakıf için ahz ü kabz eyledim ba‘de’l-yevm mezbûr Mehmed Çelebi [92] ücret-i merkūmeyi sene be-sene cânib-i vakfa edâ eyleye zikr olunan arsayı zabt ve tasarruf edip kimesne dahl ve ta‘arruz etmeye dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’r-râbi‘ aşer min Cumâdelâhire li sene tis‘în ve elf. Şuhûdü’l-hâl: Mustafa Çelebi b. Dilâver, Mustafa Beşe b. Ali, İsmail Çelebi b. Mehmed, Hüseyin Çelebi b. Ali, Hasan Çelebi b. Ali, Mehmed Çelebi b. Hüseyin, Musa Bey b. Arslan, Mehmed Çelebi b. Hasan, İbrahim Çelebi b. Ali, Ali Çelebi b. Abdurrahman, Dilâver Bey Bevvâb-ı sultânî