Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 142 Hüküm no: 167 Orijinal metin no: [96-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Salamon v. Aslan’ın Yako v. Yasef’deki alacağını talep ettiği ve sulh oldukları Havâss-ı Aliyye kazâsı müzâfâtından kasaba-i Hasköy mahallâtından Pîrî Paşa mahallesi ahâlîsinden Salamon v. Aslan nâm Yahudi meclis-i şer‘-i şerîf-i lâzımü’t-teşrîfde işbu râfi‘ü’s-sifr Yako v. Yasef nâm Yahudi muvâcehesinde ikrâr ve takrîr-i kelâm edip mezbûr Yako zimmetinde levni ve cinsi beynimizde ma‘lûm çuka bahâsından on sekiz esedî guruş hakkım olmağın meblağ-ı mezbûr on sekiz esedî guruşu mezbûr Yako’dan taleb eylediğimde ol dahi inkâr etmeğin ben dahi müdde‘âmı isbât sadedinde iken beynimize muslihûn tavassut edip meblağ-ı mezbûr da‘vâsından beni beş esedî guruş üzerine inşâ-i akd-i sulh ettiklerinde ben dahi sulh-i mezbûru kabûl ve bedel-i sulh olan meblağ-ı mezbûr beş kıt‘a esedî guruşu mezbûr Yako yedinden bi’t-tamâm ve’l-kemâl ahz ü kabz edip meblağ-ı mezbûr on sekiz guruşa müte‘allika cemî‘ da‘vâdan mezbûr Yako’nun zimmetini ibrâ-i âm ile kātı‘ü’n-nizâ‘la ibrâ ve iskāt eyledim dedikde mukırr-ı mezbûr Salamon’un vech-i meşrûh üzre cârî ve sâdır olan ikrârını mezbûr Yako vicâhen tasdîk ve şifâhen tahkīk etmeğin mâ vaka‘a bi’t-taleb ketb olundu. Fi’l-yevmi’s-sâlis min Recebi’l-mürecceb li sene tis‘în ve elf. Şuhûdü’l-hâl: Hasan Çelebi b. Mustafa, Mehmed Bey b. Ali, Abdülbâkī b. Ömer, Ali Çelebi b. Abdurrahman, Dilâver Bey Muhzır